aaj yunhi humse wo shikwa gila karne lage

aaj yūñhī ham se vo shikva gila karne lage

log us par jaane kyā kyā tabsira karne lage

vo mirī ma.asūmiyat ke mo'tarif ho jā.eñge

apne dil ko sang se jo aa.ina karne lage

chāñd jab niklā to jaane kaun yaad aayā hameñ

ham achānak jaane kis kā tazkira karne lage

aib ḳhud meñ dūsroñ meñ ḳhūbiyāñ aa.iiñ nazar

ham jo apnī zindagī kā tajziya karne lage

Dhang se chalnā zamīñ par aaj tak aayā nahīñ

go ḳhalā meñ murtasim ham naqsh-e-pā karne lage

ḳhud ko insāñ ke nishāne se bachā.eñ kis tarah

jānvar ādam-gazīda mashvara karne lage

dushmanoñ ne aaj jo dekhā mirā husn-e-sulūk

vo 'vafā' apnā nishāna ḳhud ḳhatā karne lage

aaj yunhi hum se wo shikwa gila karne lage

log us par jaane kya kya tabsira karne lage

wo meri masumiyat ke mo'tarif ho jaenge

apne dil ko sang se jo aaina karne lage

chand jab nikla to jaane kaun yaad aaya hamein

hum achanak jaane kis ka tazkira karne lage

aib KHud mein dusron mein KHubiyan aain nazar

hum jo apni zindagi ka tajziya karne lage

Dhang se chalna zamin par aaj tak aaya nahin

go KHala mein murtasim hum naqsh-e-pa karne lage

KHud ko insan ke nishane se bachaen kis tarah

jaanwar aadam-gazida mashwara karne lage

dushmanon ne aaj jo dekha mera husn-e-suluk

wo 'wafa' apna nishana KHud KHata karne lage