aaj zara fursat pai thi aaj use phir yaad kiya

aaj zarā fursat paa.ī thī aaj use phir yaad kiyā

band galī ke āḳhirī ghar ko khol ke phir ābād kiyā

khol ke khiḌkī chāñd hañsā phir chāñd ne donoñ hāthoñ se

rañg uḌaa.e phuul khilā.e chiḌiyoñ ko āzād kiyā

baḌe baḌe ġham khaḌe hue the rasta roke rāhoñ meñ

chhoTī chhoTī ḳhushiyoñ se hī ham ne dil ko shaad kiyā

baat bahut ma.amūlī sī thī ulajh ga.ī takrāroñ meñ

ek zarā sī zid ne āḳhir donoñ ko barbād kiyā

dānāoñ kī baat na maanī kaam aa.ī nādānī hī

sunā havā ko paḌhā nadī ko mausam ko ustād kiyā

aaj zara fursat pai thi aaj use phir yaad kiya

band gali ke aaKHiri ghar ko khol ke phir aabaad kiya

khol ke khiDki chand hansa phir chand ne donon hathon se

rang uDae phul khilae chiDiyon ko aazad kiya

baDe baDe gham khaDe hue the rasta roke rahon mein

chhoTi chhoTi KHushiyon se hi hum ne dil ko shad kiya

baat bahut mamuli si thi ulajh gai takraron mein

ek zara si zid ne aaKHir donon ko barbaad kiya

danaon ki baat na mani kaam aai nadani hi

suna hawa ko paDha nadi ko mausam ko ustad kiya