aaKHirash aaraishon ki zindagi chubhne lagi

āḳhirash ārā.ishoñ kī zindagī chubhne lagī

uub sī hone lagī mujh ko ḳhushī chubhne lagī

maiñ na kahtā thā ki thoḌī c havas baaqī rakho

dekh lo ab is tarah āsūdgī chubhne lagī

ḳhvāb kā sailāb kyā guzrā nigāhoñ se mirī

ret palkoñ se jo chipkī niiñd bhī chubhne lagī

tīrgī kā dasht naapā raushnī ke vāste

raushnī phailī to mujh ko raushnī chubhne lagī

saḳht ek lamhe kī rau meñ aa ke tauba kar ga.e

halq meñ mere magar ab tishnagī chubhne lagī

ik pashemānī sī thī mujh ko mirī āvāz se

aur jab maiñ chup huā to ḳhāmushī chubhne lagī

ye bhī kyā hai bhed merā khol do tum bārhā

yaar 'saurabh' ab to terī muḳhbirī chubhne lagī

aaKHirash aaraishon ki zindagi chubhne lagi

ub si hone lagi mujh ko KHushi chubhne lagi

main na kahta tha ki thoDi c hawas baqi rakho

dekh lo ab is tarah aasudgi chubhne lagi

KHwab ka sailab kya guzra nigahon se meri

ret palkon se jo chipki nind bhi chubhne lagi

tirgi ka dasht napa raushni ke waste

raushni phaili to mujh ko raushni chubhne lagi

saKHt ek lamhe ki rau mein aa ke tauba kar gae

halq mein mere magar ab tishnagi chubhne lagi

ek pashemani si thi mujh ko meri aawaz se

aur jab main chup hua to KHamushi chubhne lagi

ye bhi kya hai bhed mera khol do tum barha

yar 'saurabh' ab to teri muKHbiri chubhne lagi