aaKHiri ashk hai aur pahli aza-dari hai

āḳhirī ashk hai aur pahlī azā-dārī hai

majlis-e-hijr bapā karne kī tayyārī hai

jis kī jo marzī ho vo rakh ke chalā jaatā hai

merī duniyā hai ki ahbāb kī almārī hai

nuur ke haath pe bai'at hai mirī āñkhoñ kī

ab añdheroñ kī taraf dekhnā ġhaddārī hai

DhūñDne niklā huuñ maiñ us ke pasandīda phuul

merī is shahr meñ ye pahlī ḳharīdārī hai

raakh se le ke uThūñgā maiñ ḳhazāne kā surāġh

merā is aag meñ jal bujhnā adākārī hai

jhūTā khāne se bhī lag jaatī ho aadat jaise

ye mohabbat bhī tire dar kī namak-ḳhvārī hai

niim ke peḌ se karnā hai jinheñ shahd vasūl

un zamānoñ kī taraf merā safar jaarī hai

jaane kis shaḳhs ke paañv ko chhuā hai us ne

tez āñdhī meñ bhī sahrā pe sukūñ taarī hai

narm gāloñ pe sarakte hue sūraj kā ġhurūb

ye nazārā hai ki rangoñ kī dukāñ-dārī hai

baañT detā huuñ mohabbat ko faqīroñ meñ 'munīr'

ye bhī purkhoñ kī virāsat se vafādārī hai

aaKHiri ashk hai aur pahli aza-dari hai

majlis-e-hijr bapa karne ki tayyari hai

jis ki jo marzi ho wo rakh ke chala jata hai

meri duniya hai ki ahbab ki almari hai

nur ke hath pe bai'at hai meri aankhon ki

ab andheron ki taraf dekhna ghaddari hai

DhunDne nikla hun main us ke pasandida phul

meri is shahr mein ye pahli KHaridari hai

rakh se le ke uThunga main KHazane ka suragh

mera is aag mein jal bujhna adakari hai

jhuTa khane se bhi lag jati ho aadat jaise

ye mohabbat bhi tere dar ki namak-KHwari hai

nim ke peD se karna hai jinhen shahd wasul

un zamanon ki taraf mera safar jari hai

jaane kis shaKHs ke panw ko chhua hai us ne

tez aandhi mein bhi sahra pe sukun tari hai

narm galon pe sarakte hue suraj ka ghurub

ye nazara hai ki rangon ki dukan-dari hai

banT deta hun mohabbat ko faqiron mein 'munir'

ye bhi purkhon ki wirasat se wafadari hai