aaKHiri hal tha yahi pesh-e-nazar jaane diya

āḳhirī hal thā yahī pesh-e-nazar jaane diyā

ek gahrī saañs lī phir ḳhvāb mar jaane diyā

sārbānā de gavāhī mujh ko pyārī thī anā

rakh liyā zād-e-safar aur ham-safar jaane diyā

hazrat-e-nāseh kī ḳhush-uftādgī pe daad hai

ḳhud jidhar se aa.e the sab ko udhar jaane diyā

is harīm-e-nāz meñ yuuñ be-mahābā guftugū

kuchh bharam rakkhā to hotā tum ko gar jaane diyā

tujh ko rokā jā rahā thā raushnī thī jab talak

shaam ke Dhalte samay sūraj ko ghar jaane diyā

aañkh sapne dekhtī thī āñsuoñ se kyoñ bharī

chāhtī to pūchh letī maiñ magar jaane diyā

dostā qismat na ho to koshisheñ bekār haiñ

sabr kā paimāna ham ne ḳhud hī bhar jaane diyā

dil musir thā bārhā kuchh jāñchne ko ruk ga.e

āḳhirash us ne hameñ bār-e-digar jaane diyā

aaKHiri hal tha yahi pesh-e-nazar jaane diya

ek gahri sans li phir KHwab mar jaane diya

sarbana de gawahi mujh ko pyari thi ana

rakh liya zad-e-safar aur ham-safar jaane diya

hazrat-e-naseh ki KHush-uftadgi pe dad hai

KHud jidhar se aae the sab ko udhar jaane diya

is harim-e-naz mein yun be-mahaba guftugu

kuchh bharam rakkha to hota tum ko gar jaane diya

tujh ko roka ja raha tha raushni thi jab talak

sham ke Dhalte samay suraj ko ghar jaane diya

aankh sapne dekhti thi aansuon se kyon bhari

chahti to puchh leti main magar jaane diya

dosta qismat na ho to koshishen bekar hain

sabr ka paimana hum ne KHud hi bhar jaane diya

dil musir tha barha kuchh jaanchne ko ruk gae

aaKHirash us ne hamein bar-e-digar jaane diya