aalam-e-hairat ka dekho ye tamasha ek aur

ālam-e-hairat kā dekho ye tamāshā ek aur

yaar ne ā.īne meñ apnā sā dekhā ek aur

marne vāloñ meñ rahā jaatā hai jiitā ek aur

nīm-bismil huuñ maiñ qātil haath puurā ek aur

rafta rafta dil ko dil se raah ho jaa.e kahīñ

un se milne kā rahe poshīda rasta ek aur

ek to missī kā naqsha jam rahā hai shaam se

paan kī laalī ne rang apnā jamāyā ek aur

maiñ ne maanā aap ne bose diye maiñ ne liye

vo kahāñ niklī jo hai merī tamannā ek aur

yaad meñ ik shoḳh punjabi ke rote haiñ jo ham

āj-kal punjab meñ bahtā hai dariyā ek aur

un kā jhūmar dekh kar kahne lage ahl-e-zamīñ

dekh le ai āsmāñ aqd-e-surayyā ek aur

jīte-jī to dāman-e-sahrā kā ḳhil.at mil gayā

ba.ad marne ke mile un kā dupaTTa ek aur

bazm se saaqī ke ham se rind nikle pāk-sāf

apnā ab ka.abe meñ pahuñchegā musallā ik aur

shā.irān-e-asr kī tujh ko to hai paiġhambarī

bū-salīmī bhī hue ai 'mehr' paidā ek aur

aalam-e-hairat ka dekho ye tamasha ek aur

yar ne aaine mein apna sa dekha ek aur

marne walon mein raha jata hai jita ek aur

nim-bismil hun main qatil hath pura ek aur

rafta rafta dil ko dil se rah ho jae kahin

un se milne ka rahe poshida rasta ek aur

ek to missi ka naqsha jam raha hai sham se

pan ki lali ne rang apna jamaya ek aur

main ne mana aap ne bose diye main ne liye

wo kahan nikli jo hai meri tamanna ek aur

yaad mein ek shoKH punjabi ke rote hain jo hum

aaj-kal punjab mein bahta hai dariya ek aur

un ka jhumar dekh kar kahne lage ahl-e-zamin

dekh le ai aasman aqd-e-surayya ek aur

jite-ji to daman-e-sahra ka KHilat mil gaya

baad marne ke mile un ka dupaTTa ek aur

bazm se saqi ke hum se rind nikle pak-saf

apna ab kabe mein pahunchega musalla ek aur

shairan-e-asr ki tujh ko to hai paighambari

bu-salimi bhi hue ai 'mehr' paida ek aur