aana bhi aane wale ka afsana ho gaya

aanā bhī aane vaale kā afsāna ho gayā

dushman ke kahne sunñe se kyā kyā na ho gayā

kyā faizyāb sohbat-e-rindāna ho gayā

dam-bhar meñ shaiḳh sāqī-e-mai-ḳhāna ho gayā

sunte haiñ band phir dar-e-mai-ḳhāna ho gayā

duur ayāġh-o-shaġhl-e-mul afsāna ho gayā

milne ke ba.ad baiTh rahā pher kar nigāh

zālim yagāna hote hī begāna ho gayā

apnoñ se bhī ziyāda jo paayā niyāz-mand

vo be-niyāz aur bhī begāna ho gayā

nā-āshnā rahā to yagāna banā rahā

hote hī āshnā koī begāna ho gayā

maanā ki mudda.ī se koī mudda.ā na thā

phir kyā sabab thā tark jo yārāna ho gayā

kis tarah apnī ḳhāna-ḳharābī ayaañ kare

vo dil jo parde vāloñ kā kāshāna ho gayā

aane kā va.ada kar ke vo hañste hue chale

ma.alūm abhī se lutf-e-qadīmāna ho gayā

jaan is dilāvarī se tire manchale ne dī

maqtal meñ shor-e-himmat-e-mardāna ho gayā

phir bhī savāl-e-vasl kā mauqa nahīñ milā

sau baar go kalām-e-kalīmāna ho gayā

vo dil-jalā thā maiñ ki tirī sham-e-husn par

jal kar nisār sūrat-e-parvāna ho gayā

majnūñ jo ban gayā kisī lailā-adā kā maiñ

phir kyā thā najd ḳhud mirā vīrāna ho gayā

gesū banā.e jā.iye aap apne shauq se

ho jaane dījiye jo maiñ dīvāna ho gayā

pī lī 'hijāb' haath hī se aaj maiñ ne mai

chullū mirā mire liye paimāna ho gayā

aana bhi aane wale ka afsana ho gaya

dushman ke kahne sunne se kya kya na ho gaya

kya faizyab sohbat-e-rindana ho gaya

dam-bhar mein shaiKH saqi-e-mai-KHana ho gaya

sunte hain band phir dar-e-mai-KHana ho gaya

dur ayagh-o-shaghl-e-mul afsana ho gaya

milne ke baad baiTh raha pher kar nigah

zalim yagana hote hi begana ho gaya

apnon se bhi ziyaada jo paya niyaz-mand

wo be-niyaz aur bhi begana ho gaya

na-ashna raha to yagana bana raha

hote hi aashna koi begana ho gaya

mana ki muddai se koi muddaa na tha

phir kya sabab tha tark jo yarana ho gaya

kis tarah apni KHana-KHarabi ayan kare

wo dil jo parde walon ka kashana ho gaya

aane ka wada kar ke wo hanste hue chale

malum abhi se lutf-e-qadimana ho gaya

jaan is dilawari se tere manchale ne di

maqtal mein shor-e-himmat-e-mardana ho gaya

phir bhi sawal-e-wasl ka mauqa nahin mila

sau bar go kalam-e-kalimana ho gaya

wo dil-jala tha main ki teri sham-e-husn par

jal kar nisar surat-e-parwana ho gaya

majnun jo ban gaya kisi laila-ada ka main

phir kya tha najd KHud mera virana ho gaya

gesu banae jaiye aap apne shauq se

ho jaane dijiye jo main diwana ho gaya

pi li 'hijab' hath hi se aaj main ne mai

chullu mera mere liye paimana ho gaya