aandhi ki zad mein sham-e-tamanna jalai jae

āñdhī kī zad meñ sham-e-tamannā jalā.ī jaa.e

jis tarah bhī ho laaj junūñ kī bachā.ī jaa.e

be-āb o be-giyāh hai ye dil kā dasht bhī

ik nahr āñsuoñ kī yahāñ bhī bahā.ī jaa.e

aajiz haiñ apne tāla-e-bedār se bahut

har raat ham ko koī kahānī sunā.ī jaa.e

sab kuchh badal gayā hai magar log haiñ ba-zid

mahtāb hī meñ sūrat-e-jānāñ dikhā.ī jaa.e

kuchh sāġharoñ meñ zahr hai kuchh meñ sharāb hai

ye mas.ala hai tishnagī kis se bujhā.ī jaa.e

shahroñ kī sarhadoñ pe hai sahrāoñ kā hujūm

kyā mājrā hai aao ḳhabar to lagā.ī jaa.e

nāzil ho jism o ruuh pe jab be-hisī kā qahr

us vaqt dosto ye ġhazal gungunā.ī jaa.e

aandhi ki zad mein sham-e-tamanna jalai jae

jis tarah bhi ho laj junun ki bachai jae

be-ab o be-giyah hai ye dil ka dasht bhi

ek nahr aansuon ki yahan bhi bahai jae

aajiz hain apne tala-e-bedar se bahut

har raat hum ko koi kahani sunai jae

sab kuchh badal gaya hai magar log hain ba-zid

mahtab hi mein surat-e-jaanan dikhai jae

kuchh sagharon mein zahr hai kuchh mein sharab hai

ye masala hai tishnagi kis se bujhai jae

shahron ki sarhadon pe hai sahraon ka hujum

kya majra hai aao KHabar to lagai jae

nazil ho jism o ruh pe jab be-hisi ka qahr

us waqt dosto ye ghazal gungunai jae