aandhiyan gham ki chalin aur karb-baadal chha gae

āñdhiyāñ ġham kī chalīñ aur karb-bādal chhā ga.e

tujh se kaise ho milan sab rāste dhuñdlā ga.e

kirchī kirchī ḳhvāhisheñ āñkhoñ meñ chubh kar rah ga.iiñ

zard mausam aas kī hariyāliyoñ ko khā ga.e

maiñ ki jis ne har sa.ūbat muskurā kar jhel lī

manzileñ aa.iiñ to kyuuñ āñkhoñ meñ aañsū aa ga.e

tere nā aane ke dukh meñ shiddateñ phūloñ ne kiiñ

vaqt se pahle hī sab gajre mire murjhā ga.e

qaht jazboñ kā paḌā vīrāñ se haiñ dil ke nagar

shahr par aaseb shāyad hijr ke mañDlā ga.e

da.avā chāhat kā nahīñ par jab use sochā 'urūj'

phuul ḳhushbū rang taare aañkh meñ lahrā ga.e

aandhiyan gham ki chalin aur karb-baadal chha gae

tujh se kaise ho milan sab raste dhundla gae

kirchi kirchi KHwahishen aankhon mein chubh kar rah gain

zard mausam aas ki hariyaliyon ko kha gae

main ki jis ne har saubat muskura kar jhel li

manzilen aain to kyun aankhon mein aansu aa gae

tere na aane ke dukh mein shiddaten phulon ne kin

waqt se pahle hi sab gajre mere murjha gae

qaht jazbon ka paDa viran se hain dil ke nagar

shahr par aaseb shayad hijr ke manDla gae

dawa chahat ka nahin par jab use socha 'uruj'

phul KHushbu rang tare aankh mein lahra gae