aane meñ jhijhak milne meñ hayā tum aur kahīñ ham aur kahīñ
ab ahd-e-vafā TuuTā ki rahā tum aur kahīñ ham aur kahīñ
be-āp ḳhushī se ek idhar kuchh khoyā huā sā ek udhar
zāhir meñ baham bātin meñ judā tum aur kahīñ ham aur kahīñ
aa.e to ḳhushāmad se aa.e baiThe to muravvat se baiThe
milnā hī ye kyā jab dil na milā tum aur kahīñ ham aur kahīñ
va.ada bhī kiyā to kī na vafā aatā hai tumheñ charkoñ meñ mazā
chhoḌo bhī ye zid lutf is meñ hai kyā tum aur kahīñ ham aur kahīñ
bargashta-nasīb kā yuuñ honā sonā bhī to ik karvaT sonā
kab tak ye judā.ī kā ronā tum aur kahīñ ham aur kahīñ
dil milne pe bhī pahlū na milā dushman to baġhal hī meñ hai chhupā
qātil hai mohabbat kī ye hayā tum aur kahīñ ham aur kahīñ
yaksūī-e-dil marġhūb hameñ barbādi-e-dil matlūb tumheñ
is zid kā hai aur anjām hī kyā tum aur kahīñ ham aur kahīñ
dil se hai agar qaa.em rishta to dūr-o-qarīb kī bahs hī kyā
hai ye bhī nigāhoñ kā dhokā tum aur kahīñ ham aur kahīñ
sun rakkho qabl-e-ahd-e-vafā qaul ārzū-e-shaidā.ī kā
jannat bhī hai dozaḳh gar ye huā tum aur kahīñ ham aur kahīñ
aane mein jhijhak milne mein haya tum aur kahin hum aur kahin
ab ahd-e-wafa TuTa ki raha tum aur kahin hum aur kahin
be-ap KHushi se ek idhar kuchh khoya hua sa ek udhar
zahir mein baham baatin mein juda tum aur kahin hum aur kahin
aae to KHushamad se aae baiThe to murawwat se baiThe
milna hi ye kya jab dil na mila tum aur kahin hum aur kahin
wada bhi kiya to ki na wafa aata hai tumhein charkon mein maza
chhoDo bhi ye zid lutf is mein hai kya tum aur kahin hum aur kahin
bargashta-nasib ka yun hona sona bhi to ek karwaT sona
kab tak ye judai ka rona tum aur kahin hum aur kahin
dil milne pe bhi pahlu na mila dushman to baghal hi mein hai chhupa
qatil hai mohabbat ki ye haya tum aur kahin hum aur kahin
yaksui-e-dil marghub hamein barbaadi-e-dil matlub tumhein
is zid ka hai aur anjam hi kya tum aur kahin hum aur kahin
dil se hai agar qaem rishta to dur-o-qarib ki bahs hi kya
hai ye bhi nigahon ka dhoka tum aur kahin hum aur kahin
sun rakkho qabl-e-ahd-e-wafa qaul aarzu-e-shaidai ka
jannat bhi hai dozaKH gar ye hua tum aur kahin hum aur kahin
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
