aane wali sadi ke lagte hain

aane vaalī sadī ke lagte haiñ

pañkh ujle parī ke lagte haiñ

ba.ad muddat ke shahr kī chhat par

kuchh sitāre ḳhushī ke lagte haiñ

Duubī kashtī ke tairte chappū

hausle zindagī ke lagte haiñ

haath ḳhūnī kisī darinde ke

paañv to aadmī ke lagte haiñ

koī chehra bhī chhū nahīñ paate

aks sab aarsī ke lagte haiñ

yuuñ utartī haiñ dil meñ vo nazreñ

bol se ḳhāmushī ke lagte haiñ

haath pe haath dhar ke baiThī shaam

rañg ye bebasī ke lagte haiñ

aane wali sadi ke lagte hain

pankh ujle pari ke lagte hain

baad muddat ke shahr ki chhat par

kuchh sitare KHushi ke lagte hain

Dubi kashti ke tairte chappu

hausle zindagi ke lagte hain

hath KHuni kisi darinde ke

panw to aadmi ke lagte hain

koi chehra bhi chhu nahin pate

aks sab aarsi ke lagte hain

yun utarti hain dil mein wo nazren

bol se KHamushi ke lagte hain

hath pe hath dhar ke baiThi sham

rang ye bebasi ke lagte hain