aankh dikhlane laga hai wo fusun-saz mujhe

aañkh dikhlāne lagā hai vo fusūñ-sāz mujhe

kahīñ ab ḳhaak na chhanvā.e ye andāz mujhe

kaise hairāñ the tum ā.īne meñ jab aañkh laḌī

aaj tak yaad hai is ishq kā āġhāz mujhe

sāmne aa nahīñ sakte ki hijāb aatā hai

parda-e-dil se sunāte haiñ vo āvāz mujhe

tīliyāñ toḌ ke nikle sab asīrān-e-qafas

magar ab tak na milī ruḳhsat-e-parvāz mujhe

par katar de are sayyād chhurī phernā kyā

maar Dālegī yūñhī hasrat-e-parvāz mujhe

zer-e-dīvār-e-sanam qabr meñ sotā huuñ falak

kyuuñ na ho tāla-e-bedār par ab naaz mujhe

be-dhaḌak aa.e na zindāñ meñ nasīm-e-vahshat

mast kar detī hai zanjīr kī āvāz mujhe

parda-e-hijr vahī hasti-e-mauhūm thī 'yās'

sach hai pahle nahīñ mālūm thā ye raaz mujhe

aankh dikhlane laga hai wo fusun-saz mujhe

kahin ab KHak na chhanwae ye andaz mujhe

kaise hairan the tum aaine mein jab aankh laDi

aaj tak yaad hai is ishq ka aaghaz mujhe

samne aa nahin sakte ki hijab aata hai

parda-e-dil se sunate hain wo aawaz mujhe

tiliyan toD ke nikle sab asiran-e-qafas

magar ab tak na mili ruKHsat-e-parwaz mujhe

par katar de are sayyaad chhuri pherna kya

mar Dalegi yunhi hasrat-e-parwaz mujhe

zer-e-diwar-e-sanam qabr mein sota hun falak

kyun na ho tala-e-bedar par ab naz mujhe

be-dhaDak aae na zindan mein nasim-e-wahshat

mast kar deti hai zanjir ki aawaz mujhe

parda-e-hijr wahi hasti-e-mauhum thi 'yas'

sach hai pahle nahin malum tha ye raaz mujhe