aankh jhukti hai na wo rang-e-haya jata hai

aañkh jhuktī hai na vo rang-e-hayā jaatā hai

yaar vo shaḳhs baḌe zaḳhm lagā jaatā hai

maiñ vo patthar huuñ ki vahshat meñ uThā kar jis ko

be-sabab yūñhī kahīñ pheñk diyā jaatā hai

zindagī jaise koī tez havā kā jhoñkā

yūñhī aatā hai zarā ḳhaak uḌā jaatā hai

maiñ kisī sā’at-e-maujūd meñ maujūd nahīñ

maiñ vo lamha hī nahīñ jis ko jiyā jaatā hai

be-gila yuuñ bhī hai har shaḳhs na.e hākim se

jo gila karne ko jaatā hai galā jaatā hai

maiñ vo raste meñ bhaTaktā huā andhā huuñ 'vasīm'

jis ko har shaḳhs ġhalat raah lagā jaatā hai

aankh jhukti hai na wo rang-e-haya jata hai

yar wo shaKHs baDe zaKHm laga jata hai

main wo patthar hun ki wahshat mein uTha kar jis ko

be-sabab yunhi kahin phenk diya jata hai

zindagi jaise koi tez hawa ka jhonka

yunhi aata hai zara KHak uDa jata hai

main kisi sa’at-e-maujud mein maujud nahin

main wo lamha hi nahin jis ko jiya jata hai

be-gila yun bhi hai har shaKHs nae hakim se

jo gila karne ko jata hai gala jata hai

main wo raste mein bhaTakta hua andha hun 'wasim'

jis ko har shaKHs ghalat rah laga jata hai