aankh khuli to mujhko ye idrak hua

aañkh khulī to mujh ko ye idrāk huā

ḳhvāb-nagar kā har manzar saffāk huā

jism o jaan kā saarā qissa paak huā

ḳhākī thā maiñ ḳhaak meñ mil kar ḳhaak huā

mujh par shak karne se pahle dekh to le

merā dāman kis jānib se chaak huā

ek hī pal meñ jā pahuñchā duniyā se paar

Dūbne vaalā sab se baḌā tairāk huā

TukḌoñ TukḌoñ baañT rahā hai chehre ko

TuuT ke shīsha aur bhī kuchh be-bāk huā

raat ko maiñ ne din karne kī Thānī hai

merī zid par sūraj bhī namnāk huā

kaisī mohabbat kaisā ta.alluq Dhoñg hai sab

maañ ke alāva har rishta nāpāk huā

din meñ nikalnā chhoḌ diyā us ne bhī

aaj kā jugnū bachchoñ se chālāk huā

aankh khuli to mujh ko ye idrak hua

KHwab-nagar ka har manzar saffak hua

jism o jaan ka sara qissa pak hua

KHaki tha main KHak mein mil kar KHak hua

mujh par shak karne se pahle dekh to le

mera daman kis jaanib se chaak hua

ek hi pal mein ja pahuncha duniya se par

Dubne wala sab se baDa tairak hua

TukDon TukDon banT raha hai chehre ko

TuT ke shisha aur bhi kuchh be-bak hua

raat ko main ne din karne ki Thani hai

meri zid par suraj bhi namnak hua

kaisi mohabbat kaisa talluq Dhong hai sab

man ke alawa har rishta napak hua

din mein nikalna chhoD diya us ne bhi

aaj ka jugnu bachchon se chaalak hua