aankh khulne pe bhi hota hun usi KHwab mein gum

aañkh khulne pe bhī hotā huuñ usī ḳhvāb meñ gum

der tak rahtā huuñ ik lazzat-e-nāyāb meñ gum

soch hī soch meñ tūfān uThā detā huuñ

aur ho jaatā huuñ ik mauja-e-girdāb meñ gum

ik sitāra jo chamaktā hai lab-e-bām kahīñ

dekhte dekhte ho jaatā hai mahtāb meñ gum

bach rahe saañs to jaanā hai unhīñ galiyoñ meñ

aur honā hai usī halqa-e-ahbāb meñ gum

aise nashshe se sivā aur nasha kyā hotā

aap kā ḳhvāb jo ho jaatā mire ḳhvāb meñ gum

sajda-e-shauq ke māthoñ se nishāñ miTne lage

ho ga.ī rasm-e-azāñ gumbad-o-mehrāb meñ gum

gum to honā thā ba-har-hāl kisī manzar meñ

dil huā ḳhvāb meñ gum aañkh huī aab meñ gum

aankh khulne pe bhi hota hun usi KHwab mein gum

der tak rahta hun ek lazzat-e-nayab mein gum

soch hi soch mein tufan uTha deta hun

aur ho jata hun ek mauja-e-girdab mein gum

ek sitara jo chamakta hai lab-e-baam kahin

dekhte dekhte ho jata hai mahtab mein gum

bach rahe sans to jaana hai unhin galiyon mein

aur hona hai usi halqa-e-ahbab mein gum

aise nashshe se siwa aur nasha kya hota

aap ka KHwab jo ho jata mere KHwab mein gum

sajda-e-shauq ke mathon se nishan miTne lage

ho gai rasm-e-azan gumbad-o-mehrab mein gum

gum to hona tha ba-har-haal kisi manzar mein

dil hua KHwab mein gum aankh hui aab mein gum