aankh ko dil ka azadar nahin hone diya

aañkh ko dil kā azādār nahīñ hone diyā

ya.anī patthar kā sazā-vār nahīñ hone diyā

us kī āñkhoñ meñ ra.ūnat mirī āñkhoñ meñ ḳhumār

donoñ dariyāoñ kā inkār nahīñ hone diyā

maiñ ne phir chuum ke batlāyā ki vo zinda hai

maiñ ne us shaḳhs ko dīvār nahīñ hone diyā

ham use hijr kī bhaTTī meñ nahīñ jhoñk sake

ham ne is nuur ko finnār nahīñ hone diyā

reshmī kaan masā.ib bhī nahīñ sun sakte

is liye karb kā iz.hār nahīñ hone diyā

ek devī thī jo āñkhoñ se suḳhan bāñTtī thī

us ne ham aisoñ ko bekār nahīñ hone diyā

jab use bhūlne lagte vo nazar aa jaatā

us ne but-ḳhāne ko mismār nahīñ hone diyā

aankh ko dil ka azadar nahin hone diya

yani patthar ka saza-war nahin hone diya

us ki aankhon mein raunat meri aankhon mein KHumar

donon dariyaon ka inkar nahin hone diya

main ne phir chum ke batlaya ki wo zinda hai

main ne us shaKHs ko diwar nahin hone diya

hum use hijr ki bhaTTi mein nahin jhonk sake

hum ne is nur ko finnar nahin hone diya

reshmi kan masaib bhi nahin sun sakte

is liye karb ka izhaar nahin hone diya

ek dewi thi jo aankhon se suKHan banTti thi

us ne hum aison ko bekar nahin hone diya

jab use bhulne lagte wo nazar aa jata

us ne but-KHane ko mismar nahin hone diya