aankh ko jakDe the kal KHwab azabon ke

aañkh ko jakḌe the kal ḳhvāb azāboñ ke

maiñ sairāb khaḌā thā biich sarāboñ ke

tujh ko kho kar mujh par vo bhī din aa.e

chhup na sakā dukh pīchhe ka.ī naqāboñ ke

fikr kā tan kab Dhāñp sakī mad-hoshī tak

chhoḌ diye nashshoñ ne haath sharāboñ ke

umr inhī ke saath guzārī hai jānāñ

zaḳhm mujhe lagte haiñ phuul gulāboñ ke

ek savāl ne jab se mujh ko pahnā hai

sharminda haiñ saare rañg javāboñ ke

kis se pūchhūñ maiñ rasta ab tujh ghar kā

muñh takte haiñ ḳhālī varaq kitāboñ ke

jaane phir kab vaqt ye pal dohrā.egā

lag jā siine toḌ ke band hijāboñ ke

mulk meñ mere amn kī ḳhvāhish jān-e-man

bakrī jaise biich meñ sau qassāboñ ke

ḳhatm nahīñ 'shahzād' faqat tujh par taḳhlīq

ham bhī pyāre ḳhāliq haiñ kuchh ḳhvāboñ ke

aankh ko jakDe the kal KHwab azabon ke

main sairab khaDa tha bich sarabon ke

tujh ko kho kar mujh par wo bhi din aae

chhup na saka dukh pichhe kai naqabon ke

fikr ka tan kab Dhanp saki mad-hoshi tak

chhoD diye nashshon ne hath sharabon ke

umr inhi ke sath guzari hai jaanan

zaKHm mujhe lagte hain phul gulabon ke

ek sawal ne jab se mujh ko pahna hai

sharminda hain sare rang jawabon ke

kis se puchhun main rasta ab tujh ghar ka

munh takte hain KHali waraq kitabon ke

jaane phir kab waqt ye pal dohraega

lag ja sine toD ke band hijabon ke

mulk mein mere amn ki KHwahish jaan-e-man

bakri jaise bich mein sau qassabon ke

KHatm nahin 'shahzad' faqat tujh par taKHliq

hum bhi pyare KHaliq hain kuchh KHwabon ke