aankh paDte hi na tha nam shakebai ka

aañkh paḌte hī na thā naam shakebā.ī kā

dar-e-mai-ḳhāna thā naqsha tirī añgḌā.ī kā

mā-sivā us ke nahīñ jis kā koī aur sharīk

kaun batlā.egā aalam mirī tanhā.ī kā

pāk-dāmānī-e-yūsuf thī zuleḳhā kī sazā

rāsta chaak se paidā huā rusvā.ī kā

saḳhtiyāñ himmat-e-dil ho to badal jaatī haiñ

maut ik khel hai lekin tire shaidā.ī kā

ham ko un mai-kada-e-dahr se ummīd nahīñ

sāġhar ulTā huā hai gumbad-e-mīnā.ī kā

tār-e-malbūs meñ thī yā ḳhat-e-taqdīr meñ thī

haal khultā nahīñ yāqūb kī bīnā.ī kā

aane de niiñd to sab so.eñ magar ai tauba

nāla-e-ishq kā is par shab-e-tanhā.ī kā

dil-e-nāzuk mutahammil nahīñ ġham ho ki surūr

phuul maqtūl hai ḳhud apnī hī ra.anā.ī kā

na huā vasl-e-tamannā na ghaTī vahshat-e-dil

kyā natīja thā mirī bādiya-paimā.ī kā

vo na aa.eñ sar-e-bālīñ ki maiñ bachne kā nahīñ

dam na TuuTe mire saath in kī masīhā.ī kā

aa.ina jis meñ sadā Duub ke ubhrā kyā husn

ek Thahrā huā paanī hai ḳhud-ārā.ī kā

saath dene kā to ehsān hai mujh par lekin

sham.a ne naam Duboyā mirī tanhā.ī kā

husn ke haath bañdhe to vo zarā der sahī

mujh par ehsāñ tirī aa.ī huī añgḌā.ī kā

us ke sunñe ke liye jam.a huā hai mahshar

rah gayā thā jo fasāna mirī rusvā.ī kā

shauq-e-pā-bosī-e-mahbūb thā varna 'sāqib'

sañg-e-dar par koī mauqa thā jabīñ-sā.ī kā

aankh paDte hi na tha nam shakebai ka

dar-e-mai-KHana tha naqsha teri angDai ka

ma-siwa us ke nahin jis ka koi aur sharik

kaun batlaega aalam meri tanhai ka

pak-damani-e-yusuf thi zuleKHa ki saza

rasta chaak se paida hua ruswai ka

saKHtiyan himmat-e-dil ho to badal jati hain

maut ek khel hai lekin tere shaidai ka

hum ko un mai-kada-e-dahr se ummid nahin

saghar ulTa hua hai gumbad-e-minai ka

tar-e-malbus mein thi ya KHat-e-taqdir mein thi

haal khulta nahin yaqub ki binai ka

aane de nind to sab soen magar ai tauba

nala-e-ishq ka is par shab-e-tanhai ka

dil-e-nazuk mutahammil nahin gham ho ki surur

phul maqtul hai KHud apni hi ranai ka

na hua wasl-e-tamanna na ghaTi wahshat-e-dil

kya natija tha meri baadiya-paimai ka

wo na aaen sar-e-baalin ki main bachne ka nahin

dam na TuTe mere sath in ki masihai ka

aaina jis mein sada Dub ke ubhra kya husn

ek Thahra hua pani hai KHud-arai ka

sath dene ka to ehsan hai mujh par lekin

shama ne nam Duboya meri tanhai ka

husn ke hath bandhe to wo zara der sahi

mujh par ehsan teri aai hui angDai ka

us ke sunne ke liye jama hua hai mahshar

rah gaya tha jo fasana meri ruswai ka

shauq-e-pa-bosi-e-mahbub tha warna 'saqib'

sang-e-dar par koi mauqa tha jabin-sai ka