aankh se aankh mile ramz khule baat chale

aañkh se aañkh mile ramz khule baat chale

din nikalne do ki pahlū se mire raat chale

terī chūḌī kī khanak se huā tasḳhīr ye dil

terī āñkhoñ ke ishāroñ pe ḳhayālāt chale

vo sahar-ḳhez hañsī vo tirā sharmā jaanā

kaise kaise mirī hastī pe tilismāt chale

zikr ko neze kī rif.at pe sajāyā jis ne

rah gayā haq kā vo markaz so mazāfāt chale

koī taḳhlīq ke asbāb bhī samjhe nā zarā

ek nuqte se ayaañ rañg yahāñ saat chale

jab maiñ tasḳhīr tire raaz ko kar paayā to

phir mire raqs pe duniyā tire naġhmāt chale

maktab-e-aql paḌhā paḌh ke chalā maiḳhāne

jab na dānā.ī chalī phir mire jazbāt chale

purze purze hai tire hijr meñ pairāhan-e-jāñ

mujh meñ sāñsoñ kī tarah yuuñ tire sadmāt chale

lauT aa.egī mirī samt 'shajar' hariyālī

phir jo ik baar usī lams kī ḳhairāt chale

aankh se aankh mile ramz khule baat chale

din nikalne do ki pahlu se mere raat chale

teri chuDi ki khanak se hua tasKHir ye dil

teri aankhon ke ishaaron pe KHayalat chale

wo sahar-KHez hansi wo tera sharma jaana

kaise kaise meri hasti pe tilismat chale

zikr ko neze ki rifat pe sajaya jis ne

rah gaya haq ka wo markaz so mazafat chale

koi taKHliq ke asbab bhi samjhe na zara

ek nuqte se ayan rang yahan sat chale

jab main tasKHir tere raaz ko kar paya to

phir mere raqs pe duniya tere naghmat chale

maktab-e-aql paDha paDh ke chala maiKHane

jab na danai chali phir mere jazbaat chale

purze purze hai tere hijr mein pairahan-e-jaan

mujh mein sanson ki tarah yun tere sadmat chale

lauT aaegi meri samt 'shajar' hariyali

phir jo ek bar usi lams ki KHairaat chale