rone ki ye shiddat hai ki ghabra gain aankhen

rone kī ye shiddat hai ki ghabrā ga.iiñ āñkheñ

ashkoñ kī ye kasrat hai ki tañg aa ga.iiñ āñkheñ

dil saḳht hī kāfir kā par āñkhoñ meñ hayā hai

sunte hī jafā kā gila sharmā ga.iiñ āñkheñ

mehrāb meñ hotā nahīñ mastoñ kā guzāra

abrū ke tale ḳhuub jagah pā ga.iiñ āñkheñ

vo tālib-e-dīdār ke paas aa.eñ magar kyā

hairat kā ye aalam hai ki kuubā ga.iiñ āñkheñ

farhād ne kyā dekh ke sar teshe se phoḌā

sūjhā na kuchh is rū se ki tihrā ga.iiñ āñkheñ

dil de ke rahā girya-e-ḳhūnī kā mujhe shaġhl

baaqī thā jigar so use yuuñ kahā ga.iiñ āñkheñ

chaḌhte nahīñ ab merī nazar meñ mah-o-ḳhurshīd

dekhā tujhe kyā maiñ ne ki itrā ga.iiñ āñkheñ

aa kar tire kūche meñ na kuchh ham se ban aa.ī

jaate hue ik muñh thā ki barsā ga.iiñ āñkheñ

itnā bhī na samjhe ki balā-e-dil-o-dīñ hai

'nāzim' tumheñ kyuuñ us kī pasand aa ga.iiñ āñkheñ

rone ki ye shiddat hai ki ghabra gain aankhen

ashkon ki ye kasrat hai ki tang aa gain aankhen

dil saKHt hi kafir ka par aankhon mein haya hai

sunte hi jafa ka gila sharma gain aankhen

mehrab mein hota nahin maston ka guzara

abru ke tale KHub jagah pa gain aankhen

wo talib-e-didar ke pas aaen magar kya

hairat ka ye aalam hai ki kuba gain aankhen

farhad ne kya dekh ke sar teshe se phoDa

sujha na kuchh is ru se ki tihra gain aankhen

dil de ke raha girya-e-KHuni ka mujhe shaghl

baqi tha jigar so use yun kaha gain aankhen

chaDhte nahin ab meri nazar mein mah-o-KHurshid

dekha tujhe kya main ne ki itra gain aankhen

aa kar tere kuche mein na kuchh hum se ban aai

jate hue ek munh tha ki barsa gain aankhen

itna bhi na samjhe ki bala-e-dil-o-din hai

'nazim' tumhein kyun us ki pasand aa gain aankhen