aankh wale sab the lekin dida-war koi na tha

aañkh vaale sab the lekin dīda-var koī na thā

kārvāñ bhaTkā huā thā rāhbar koī na thā

maiñ to samjhā thā ki duniyā chal rahī hai saath saath

muḌ ke jab dekhā to merā ham-safar koī na thā

kis se kahte ham tirī mahfil meñ apnā rāz-e-dil

yuuñ to kahne ko sab apne the magar koī na thā

tum se pahle tīrgī meñ gum thī saarī kā.enāt

tum na the to vāqif-e-nūr-e-sahar koī na thā

sham.a thī parvāna thā maiñ thā tumhārī yaad thī

kaise kah duuñ hijr kī shab mere ghar koī na thā

koī letā kaise 'nādim' mere zaḳhmoñ kī ḳhabar

the sabhī hamdard lekin mo'atabar koī na thā

aankh wale sab the lekin dida-war koi na tha

karwan bhaTka hua tha rahbar koi na tha

main to samjha tha ki duniya chal rahi hai sath sath

muD ke jab dekha to mera ham-safar koi na tha

kis se kahte hum teri mahfil mein apna raaz-e-dil

yun to kahne ko sab apne the magar koi na tha

tum se pahle tirgi mein gum thi sari kaenat

tum na the to waqif-e-nur-e-sahar koi na tha

shama thi parwana tha main tha tumhaari yaad thi

kaise kah dun hijr ki shab mere ghar koi na tha

koi leta kaise 'nadim' mere zaKHmon ki KHabar

the sabhi hamdard lekin mo'atabar koi na tha