aankhen banata dasht ki wusat ko dekhta

āñkheñ banātā dasht kī vus.at ko dekhtā

hairat banāne vaale kī hairat ko dekhtā

hotā na koī kār-e-zamāna mire supurd

bas apne kārobār-e-mohabbat ko dekhtā

kar ke nagar nagar kā safar is zamīn par

logoñ kī būd-o-bāsh o rivāyat ko dekhtā

aatā agar ḳhayāl shajar chhāñv meñ nahīñ

ghar se nikal ke dhuup kī hiddat ko dekhtā

yuuñ lag rahā thā maiñ koī sahrā kā peḌ huuñ

us shaam to agar mirī hālat ko dekhtā

'ahmad' vo izn-e-dīd jo detā to ek shaam

ḳhud par guzarne vaalī aziyyat ko dekhtā

aankhen banata dasht ki wusat ko dekhta

hairat banane wale ki hairat ko dekhta

hota na koi kar-e-zamana mere supurd

bas apne karobar-e-mohabbat ko dekhta

kar ke nagar nagar ka safar is zamin par

logon ki bud-o-bash o riwayat ko dekhta

aata agar KHayal shajar chhanw mein nahin

ghar se nikal ke dhup ki hiddat ko dekhta

yun lag raha tha main koi sahra ka peD hun

us sham to agar meri haalat ko dekhta

'ahmad' wo izn-e-did jo deta to ek sham

KHud par guzarne wali aziyyat ko dekhta