aankhen meri talwon se wo mal jae to achchha

āñkheñ mirī talvoñ se vo mal jaa.e to achchhā

hai hasrat-e-pā-bos nikal jaa.e to achchhā

jo chashm ki be-nam ho vo ho kor to behtar

jo dil ki ho be-dāġh vo jal jaa.e to achchhā

bīmār-e-mohabbat ne liyā tere sambhālā

lekin vo sambhāle se sambhal jaa.e to achchhā

ho tujh se ayādat jo na bīmār kī apne

lene ko ḳhabar us kī ajal jaa.e to achchhā

khīñche dil-e-insāñ ko na vo zulf-e-siyah-fām

azhdar koī gar us ko nigal jaa.e to achchhā

tāsīr-e-mohabbat ajab ik hub kā amal hai

lekin ye amal yaar pe chal jaa.e to achchhā

dil gir ke nazar se tirī uThne kā nahīñ phir

ye girne se pahle hī sambhal jaa.e to achchhā

furqat meñ tirī tār-e-nafas siine meñ mere

kāñTā sā khaTaktā hai nikal jaa.e to achchhā

ai girya na rakh mere tan-e-ḳhushk ko ġharqāb

lakḌī kī tarah paanī meñ gal jaa.e to achchhā

haañ kuchh to ho hāsil samar-e-naḳhl-e-mohabbat

ye siina phaphūloñ se jo phal jaa.e to achchhā

vo sub.h ko aa.e to karūñ bātoñ meñ dopahar

aur chāhūñ ki din thoḌā sā Dhal jaa.e to achchhā

Dhal jaa.e jo din bhī to usī tarah karūñ shaam

aur chāhūñ ki gar aaj se kal jaa.e to achchhā

jab kal ho to phir vo hī kahūñ kal kī tarah se

gar aaj kā din bhī yuuñ hī Tal jaa.e to achchhā

al-qissa nahīñ chāhtā maiñ jaa.e vo yaañ se

dil us kā yahīñ garche bahal jaa.e to achchhā

hai qat.a rah-e-ishq meñ ai 'zauq' adab shart

juuñ sham.a tū ab sar hī ke bal jaa.e to achchhā

aankhen meri talwon se wo mal jae to achchha

hai hasrat-e-pa-bos nikal jae to achchha

jo chashm ki be-nam ho wo ho kor to behtar

jo dil ki ho be-dagh wo jal jae to achchha

bimar-e-mohabbat ne liya tere sambhaala

lekin wo sambhaale se sambhal jae to achchha

ho tujh se ayaadat jo na bimar ki apne

lene ko KHabar us ki ajal jae to achchha

khinche dil-e-insan ko na wo zulf-e-siyah-fam

azhdar koi gar us ko nigal jae to achchha

tasir-e-mohabbat ajab ek hub ka amal hai

lekin ye amal yar pe chal jae to achchha

dil gir ke nazar se teri uThne ka nahin phir

ye girne se pahle hi sambhal jae to achchha

furqat mein teri tar-e-nafas sine mein mere

kanTa sa khaTakta hai nikal jae to achchha

ai girya na rakh mere tan-e-KHushk ko gharqab

lakDi ki tarah pani mein gal jae to achchha

han kuchh to ho hasil samar-e-naKHl-e-mohabbat

ye sina phaphulon se jo phal jae to achchha

wo subh ko aae to karun baaton mein dopahar

aur chahun ki din thoDa sa Dhal jae to achchha

Dhal jae jo din bhi to usi tarah karun sham

aur chahun ki gar aaj se kal jae to achchha

jab kal ho to phir wo hi kahun kal ki tarah se

gar aaj ka din bhi yun hi Tal jae to achchha

al-qissa nahin chahta main jae wo yan se

dil us ka yahin garche bahal jae to achchha

hai qata rah-e-ishq mein ai 'zauq' adab shart

jun shama tu ab sar hi ke bal jae to achchha