aankhen raushan lahje ras ke pyale ji

āñkheñ raushan lahje ras ke pyāle jī

ye haiñ log mohabbat karne vaale jī

kisī kisī kā husn nashīlā hotā hai

kuchh shā.ir bhī hote haiñ matvāle jī

lamha lamha jakḌā jaatā huuñ in meñ

yādeñ haiñ yā haiñ makḌī ke jaale jī

us kī aañkh se aañsū ban kar bah nikle

mere paañv meñ paḌne vaale chhāle jī

rātoñ kā ahvāl kahāñ chhup saktā hai

sab kah dete haiñ āñkhoñ ke haale jī

maiñ ne hañs kar Taal diyā go logoñ ne

aap ke naam ke patthar ḳhuub uchhāle jī

gañgū telī aas lagā.e baiThā hai

jaa.e raaja bhoj to raaj sambhāle jī

aap ne gholā zahar fazāoñ meñ lekin

ham ne phuul ugaa.e buuTe paale jī

jañg kī bāteñ karne vaalo yaad rahe

bachte haiñ bas aaheñ aañsū naale jī

aag ugalte saañp kā shikva bejā hai

maiñ ne to bas apne phuul sambhāle jī

baap kī aañkh se mere aañsū Tapke the

bas us din se hoñToñ par haiñ taale jī

aankhen raushan lahje ras ke pyale ji

ye hain log mohabbat karne wale ji

kisi kisi ka husn nashila hota hai

kuchh shair bhi hote hain matwale ji

lamha lamha jakDa jata hun in mein

yaaden hain ya hain makDi ke jale ji

us ki aankh se aansu ban kar bah nikle

mere panw mein paDne wale chhaale ji

raaton ka ahwal kahan chhup sakta hai

sab kah dete hain aankhon ke haale ji

main ne hans kar Tal diya go logon ne

aap ke nam ke patthar KHub uchhaale ji

gangu teli aas lagae baiTha hai

jae raja bhoj to raj sambhaale ji

aap ne ghola zahar fazaon mein lekin

hum ne phul ugae buTe pale ji

jang ki baaten karne walo yaad rahe

bachte hain bas aahen aansu nale ji

aag ugalte sanp ka shikwa beja hai

main ne to bas apne phul sambhaale ji

bap ki aankh se mere aansu Tapke the

bas us din se honTon par hain tale ji