آنکھوں کے دریچوں سے سراب اترے ہیں کتنے

آنکھوں کے دریچوں سے سراب اترے ہیں کتنے

اک جاں ہے مگر اس پہ عذاب اترے ہیں کتنے

شاید تمہیں کھوئی ہوئی جنت کہیں مل جائے

دیکھو مری ان آنکھوں میں خواب اترے ہیں کتنے

جب ساعت احساں تھی تو اک بوند نہ برسی

جب اٹھ گئے پیاسے تو سحاب اترے ہیں کتنے

دنیا تجھے میں دیکھوں تو کن آنکھوں سے دیکھوں

اک شخص کے چہرے سے نقاب اترے ہیں کتنے

ہر روزن زنداں سے لہو جھانک رہا ہے

گھر گھر تری چاہت کے گلاب اترے ہیں کتنے

نغموں کا فسوں چاند کی ضو پھول کی خوشبو

اس حسن دل آرا پہ شباب اترے ہیں کتنے

اشکوں کو صفیؔ ہنس کے لٹا دل کو لہو کر

تیرے لیے اب کار ثواب اترے ہیں کتنے