aankhon ko naqsh-e-pa tera dil ko ghubar kar diya

āñkhoñ ko naqsh-e-pā tirā dil ko ġhubār kar diyā

ham ne vidā-e-yār ko apnā hisār kar diyā

is kī chhuvan se jal uThā mere badan kā rom rom

mujh ko to dast-e-yār ne jaise chinār diyā

kis ke badan kī narmiyāñ hāthoñ ko gudgudā ga.iiñ

dasht-e-firāq-e-yār ko pahlū-e-yār kar diyā

ab ke to mujh pe is tarah saaqī huā hai mehrbāñ

saare dukhoñ ko chuum kar mai kā ḳhumār kar diyā

maanā suḳhan tirī 'atā phir bhī kamāl hai mirā

maiñ ne tire jamāl ko rashk-e-bahār kar diyā

mujh se gila bajā magar tum bhī kabhī ye sochnā

mujh ko anā ke raḳhsh par kis ne savār kar diyā

zulmat-e-hijr meñ sadā us ne diyā hai hausla

ab ke magar bujhā diyā us ne bhī haar kar diyā

aankhon ko naqsh-e-pa tera dil ko ghubar kar diya

hum ne wida-e-yar ko apna hisar kar diya

is ki chhuwan se jal uTha mere badan ka rom rom

mujh ko to dast-e-yar ne jaise chinar diya

kis ke badan ki narmiyan hathon ko gudguda gain

dasht-e-firaq-e-yar ko pahlu-e-yar kar diya

ab ke to mujh pe is tarah saqi hua hai mehrban

sare dukhon ko chum kar mai ka KHumar kar diya

mana suKHan teri 'ata phir bhi kamal hai mera

main ne tere jamal ko rashk-e-bahaar kar diya

mujh se gila baja magar tum bhi kabhi ye sochna

mujh ko ana ke raKHsh par kis ne sawar kar diya

zulmat-e-hijr mein sada us ne diya hai hausla

ab ke magar bujha diya us ne bhi haar kar diya