aankhon mein ek dasht hai kab se ruka hua

āñkhoñ meñ ek dasht hai kab se rukā huā

pahlū meñ ik charāġh hai aadhā jalā huā

muddat se mere dil meñ hai koī basā huā

mahram hai merī zaat kā garche chhupā huā

rakhā huā hai chāñd kī dahlīz par qadam

rasta hai raushnī kā samundar banā huā

pahlī nazar meñ umr kā saudā huā thā tai

sach baat hai ki aañkh kā va.ada vafā huā

ḳhushbū kā raaz khol rahā hai jahān par

sheroñ meñ koī shaḳhs hai shāyad chhupā huā

dasht-e-fanā meñ DhūñD liyā apnī zaat ko

merā kahīñ na honā hī merī baqā huā

titlī chaman meñ aaj bahut chup lagī mujhe

jaise kisī gulāb pe ho dil rukā huā

kahne lagī huuñ sher maiñ 'nīlam' ke saath saath

shauq-e-navā-e-dasht mirā ham-navā huā

aankhon mein ek dasht hai kab se ruka hua

pahlu mein ek charagh hai aadha jala hua

muddat se mere dil mein hai koi basa hua

mahram hai meri zat ka garche chhupa hua

rakha hua hai chand ki dahliz par qadam

rasta hai raushni ka samundar bana hua

pahli nazar mein umr ka sauda hua tha tai

sach baat hai ki aankh ka wada wafa hua

KHushbu ka raaz khol raha hai jahan par

sheron mein koi shaKHs hai shayad chhupa hua

dasht-e-fana mein DhunD liya apni zat ko

mera kahin na hona hi meri baqa hua

titli chaman mein aaj bahut chup lagi mujhe

jaise kisi gulab pe ho dil ruka hua

kahne lagi hun sher main 'nilam' ke sath sath

shauq-e-nawa-e-dasht mera ham-nawa hua