aankhon se KHwab dil se tamanna tamam-shud

āñkhoñ se ḳhvāb dil se tamannā tamām-shud

tum kyā ga.e ki shauq-e-nazāra tamām-shud

kal tere tishnagāñ se ye kyā mo.ajaza huā

dariyā pe hoñT rakkhe to dariyā tamām-shud

duniyā to ek barf kī sil se sivā na thī

pahuñchī dukhoñ kī aañch to duniyā tamām-shud

shahr-e-dil-e-tabāh meñ pahuñchūñ to kuchh khule

kyā bach gayā hai raakh meñ aur kyā tamām-shud

ushshāq par ye ab ke ajab vaqt aa paḌā

majnūñ ke dil se hasrat-e-lailā tamām-shud

ham shahr-e-jāñ meñ āḳhirī naġhma sunā chale

samjho ki ab hamārā tamāshā tamām-shud

ik yād-e-yār hī to pas-andāz hai 'hasan'

varna vo kār-e-ishq to kab kā tamām-shud

aankhon se KHwab dil se tamanna tamam-shud

tum kya gae ki shauq-e-nazara tamam-shud

kal tere tishnagan se ye kya moajaza hua

dariya pe honT rakkhe to dariya tamam-shud

duniya to ek barf ki sil se siwa na thi

pahunchi dukhon ki aanch to duniya tamam-shud

shahr-e-dil-e-tabah mein pahunchun to kuchh khule

kya bach gaya hai rakh mein aur kya tamam-shud

ushshaq par ye ab ke ajab waqt aa paDa

majnun ke dil se hasrat-e-laila tamam-shud

hum shahr-e-jaan mein aaKHiri naghma suna chale

samjho ki ab hamara tamasha tamam-shud

ek yaad-e-yar hi to pas-andaz hai 'hasan'

warna wo kar-e-ishq to kab ka tamam-shud