aansu bhi wahi karb ke sae bhi wahi hain

aañsū bhī vahī karb ke saa.e bhī vahī haiñ

ham gardish-e-daurāñ ke satā.e bhī vahī haiñ

kyā baat hai kyuuñ shahr meñ ab jī nahīñ lagtā

hālāñki yahāñ apne parā.e bhī vahī haiñ

aurāq-e-dil-o-jāñ pe jinheñ tum ne likhā hai

naġhmāt-e-alam ham ne sunā.e bhī vahī haiñ

ai josh-e-junūñ dard kā aalam bhī vahī hai

ai vahshat-e-jāñ dard ke saa.e bhī vahī haiñ

dekhā hai jinheñ āh-ba-lab chāk-garebāñ

har dāġh-e-alam dil meñ chhupā.e bhī vahī haiñ

sau rañg bikhereñge mohabbat ke shagūfe

'gulnār' chaman meñ hameñ laa.e bhī vahī haiñ

aansu bhi wahi karb ke sae bhi wahi hain

hum gardish-e-dauran ke satae bhi wahi hain

kya baat hai kyun shahr mein ab ji nahin lagta

haalanki yahan apne parae bhi wahi hain

auraq-e-dil-o-jaan pe jinhen tum ne likha hai

naghmat-e-alam hum ne sunae bhi wahi hain

ai josh-e-junun dard ka aalam bhi wahi hai

ai wahshat-e-jaan dard ke sae bhi wahi hain

dekha hai jinhen aah-ba-lab chaak-gareban

har dagh-e-alam dil mein chhupae bhi wahi hain

sau rang bikherenge mohabbat ke shagufe

'gulnar' chaman mein hamein lae bhi wahi hain