aansu gira to kanch ka moti bikhar gaya

aañsū girā to kāñch kā motī bikhar gayā

phir sub.h tak dupaTTā sitāroñ se bhar gayā

maiñ chunarī DhūñDhtī rahī aur itnī der meñ

darvāze par khaḌā huā ik ḳhvāb mar gayā

sarmā kī chāñdnī thī javānī guzar ga.ī

jhulsā rahī hai dhuup buḌhāpā Thahar gayā

maiñ raftagāñ kī baat pe be-sāḳhta hañsī

anjām us hañsī kā bhī afsurda kar gayā

tum kah rahe ho hijr meñ martā nahīñ koī

phir kyoñ ġham-e-judā.ī meñ vo hañs mar gayā

ḳhālī galī meñ saare makāñ sochte rahe

is samt jis ko aanā thā vo kis nagar gayā

in pāniyoñ ko tishna-laboñ se gurez thā

chaḌhtī nadī kā mast bahāo utar gayā

thoḌī sī der mil ke bahut der ro liye

phir apne ghar ko maiñ ga.ī vo apne ghar gayā

saudā thā sar meñ duur bahut duur jā baseñ

azm-e-safar kiyā to mirā ham-safar gayā

patthar kī mūrtī banī maiñ dekhtī rahī

ghar pīchhe rah gayā thā vo aage guzar gayā

aansu gira to kanch ka moti bikhar gaya

phir subh tak dupaTTa sitaron se bhar gaya

main chunari DhunDhti rahi aur itni der mein

darwaze par khaDa hua ek KHwab mar gaya

sarma ki chandni thi jawani guzar gai

jhulsa rahi hai dhup buDhapa Thahar gaya

main raftagan ki baat pe be-saKHta hansi

anjam us hansi ka bhi afsurda kar gaya

tum kah rahe ho hijr mein marta nahin koi

phir kyon gham-e-judai mein wo hans mar gaya

KHali gali mein sare makan sochte rahe

is samt jis ko aana tha wo kis nagar gaya

in paniyon ko tishna-labon se gurez tha

chaDhti nadi ka mast bahao utar gaya

thoDi si der mil ke bahut der ro liye

phir apne ghar ko main gai wo apne ghar gaya

sauda tha sar mein dur bahut dur ja basen

azm-e-safar kiya to mera ham-safar gaya

patthar ki murti bani main dekhti rahi

ghar pichhe rah gaya tha wo aage guzar gaya