aansu thame jo ruKH pe wo gesu bikhar gaya

aañsū thame jo ruḳh pe vo gesū bikhar gayā

milte hī donoñ vaqt ke dariyā Thahar gayā

achchhā huā shabāb kā aalam guzar gayā

ik jin chaḌhā huā mire sar se utar gayā

yaar aa ke ḳhvāb meñ mujhe sharminda kar gayā

kyā saḳht jaan thā ki na furqat meñ mar gayā

'ushshāq kam-sinī se vo kam-sin habāb-vār

joban ne jab kuchoñ ko ubhārā ubhar gayā

ai ham-safīr bāl-fishānī kā zikr kyā

tolā jo bāzuoñ ko paroñ ko katar gayā

lauh-e-mazār bhī jo banā.ī vo sang-dil

patthar kī sil tarāsh ke chhātī pe dhar gayā

marne pe qabr bhī jo khudī mohr kī tarah

maiñ be-nishān misl-e-nagīñ naam kar gayā

bigḌā banāo kar ke jo vo but raqīb se

fazl-e-ḳhudā se kaam hamārā sañvar gayā

kyā ābdārī-e-dam-e-ḳhanjar bayāñ karūñ

paanī kā ghūñT thā ki gale se utar gayā

sunte haiñ jaan hijr meñ 'arsh'-e-hazīñ ne dī

bhūkā visāl-e-yār kā kuchh khā ke mar gayā

aansu thame jo ruKH pe wo gesu bikhar gaya

milte hi donon waqt ke dariya Thahar gaya

achchha hua shabab ka aalam guzar gaya

ek jin chaDha hua mere sar se utar gaya

yar aa ke KHwab mein mujhe sharminda kar gaya

kya saKHt jaan tha ki na furqat mein mar gaya

'ushshaq kam-sini se wo kam-sin habab-war

joban ne jab kuchon ko ubhaara ubhar gaya

ai ham-safir baal-fishani ka zikr kya

tola jo bazuon ko paron ko katar gaya

lauh-e-mazar bhi jo banai wo sang-dil

patthar ki sil tarash ke chhati pe dhar gaya

marne pe qabr bhi jo khudi mohr ki tarah

main be-nishan misl-e-nagin nam kar gaya

bigDa banao kar ke jo wo but raqib se

fazl-e-KHuda se kaam hamara sanwar gaya

kya aabdari-e-dam-e-KHanjar bayan karun

pani ka ghunT tha ki gale se utar gaya

sunte hain jaan hijr mein 'arsh'-e-hazin ne di

bhuka visal-e-yar ka kuchh kha ke mar gaya