aao be-parda tumhein jalwa-e-pinhan ki qasam

aao be-parda tumheñ jalva-e-pinhāñ kī qasam

ham na chheḌeñge hameñ zulf-e-pareshāñ kī qasam

chāk-e-dāmāñ kī qasam chāk-e-garebāñ kī qasam

hañsne vaale tujhe is hāl-e-pareshāñ kī qasam

mere armān se vāqif nahīñ sharmā.eñge aap

aap kyuuñ khāte haiñ nāhaq mire armāñ kī qasam

niind aa.e na kabhī tujh se bichhaḌ kar zālim

apnī āñkhoñ kī qasam tere shabistāñ kī qasam

lab-e-jānāñ pe fidā āriz-e-jānāñ ke nisār

shām-e-rañgīñ kī qasam sub.h-e-daraḳhshāñ kī qasam

aaj tak sub.h-e-vatan yaad hai ham ko 'aḳhtar'

dard-e-hijrāñ kī qasam shām-e-ġharībāñ kī qasam

aao be-parda tumhein jalwa-e-pinhan ki qasam

hum na chheDenge hamein zulf-e-pareshan ki qasam

chaak-e-daman ki qasam chaak-e-gareban ki qasam

hansne wale tujhe is haal-e-pareshan ki qasam

mere arman se waqif nahin sharmaenge aap

aap kyun khate hain nahaq mere arman ki qasam

nind aae na kabhi tujh se bichhaD kar zalim

apni aankhon ki qasam tere shabistan ki qasam

lab-e-jaanan pe fida aariz-e-jaanan ke nisar

sham-e-rangin ki qasam subh-e-daraKHshan ki qasam

aaj tak subh-e-watan yaad hai hum ko 'aKHtar'

dard-e-hijran ki qasam sham-e-ghariban ki qasam