aap aae the yan jafa ke liye

aap aa.e the yaañ jafā ke liye

jā.iye bhī kahīñ ḳhudā ke liye

dil diyā thā tumheñ jafā ke liye

hosh meñ aa.iye ḳhudā ke liye

tere bāzār-e-dahr meñ gardūñ

ham bhī aa.e haiñ ik qabā ke liye

paañv haiñ kūcha-e-tavakkal meñ

haath uThte nahīñ du'ā ke liye

aa kabhī to mire qafas kī taraf

ai nasīm-e-chaman ḳhudā ke liye

hai tah-e-ḳhāk farsh-e-ḳhāk lagā

shaah ke vāste gadā ke liye

dam phaḌaktā hai tauf-e-ka.aba par

dil taḌaptā hai karbalā ke liye

sar uThā.e haiñ ḳhār-e-dasht-o-junūñ

'muntahī' se barahna-pā ke liye

aap aae the yan jafa ke liye

jaiye bhi kahin KHuda ke liye

dil diya tha tumhein jafa ke liye

hosh mein aaiye KHuda ke liye

tere bazar-e-dahr mein gardun

hum bhi aae hain ek qaba ke liye

panw hain kucha-e-tawakkal mein

hath uThte nahin du'a ke liye

aa kabhi to mere qafas ki taraf

ai nasim-e-chaman KHuda ke liye

hai tah-e-KHak farsh-e-KHak laga

shah ke waste gada ke liye

dam phaDakta hai tauf-e-kaba par

dil taDapta hai karbala ke liye

sar uThae hain KHar-e-dasht-o-junun

'muntahi' se barahna-pa ke liye