aap baiThe hain baalin pe meri maut ka zor chalta nahin hai

aap baiThe haiñ bālīñ pe merī maut kā zor chaltā nahīñ hai

maut mujh ko gavārā hai lekin kyā karūñ dam nikaltā nahīñ hai

ye adā ye nazākat bharā sin merā dil tum pe qurbān lekin

kyā sañbhāloge tum mere dil ko jab ye āñchal sañbhaltā nahīñ hai

mere nāloñ kī sun kar zabāneñ ho ga.ī mom kitnī chaTāneñ

maiñ ne pighlā diyā pattharoñ ko ik terā dil pighaltā nahīñ hai

shaiḳh jī kī nasīhat bhī achchhī baat vaa.iz kī bhī ḳhuub lekin

jab bhī chhātī haiñ kaalī ghaTā.eñ bin piye kaam chaltā nahīñ hai

dekh le merī mayyat kā manzar log kāñdhā badalte chale haiñ

ek terī bhī Dolī chalī hai koī kāñdhā badaltā nahīñ hai

mai-kade ke sabhī piine vaale laḌkhaḌā kar sañbhalte haiñ lekin

terī nazroñ kā jo jaam pī le umr-bhar vo sañbhaltā nahīñ hai

aap baiThe hain baalin pe meri maut ka zor chalta nahin hai

maut mujh ko gawara hai lekin kya karun dam nikalta nahin hai

ye ada ye nazakat bhara sin mera dil tum pe qurban lekin

kya sanbhaaloge tum mere dil ko jab ye aanchal sanbhalta nahin hai

mere nalon ki sun kar zabanen ho gai mom kitni chaTanen

main ne pighla diya pattharon ko ek tera dil pighalta nahin hai

shaiKH ji ki nasihat bhi achchhi baat waiz ki bhi KHub lekin

jab bhi chhati hain kali ghaTaen bin piye kaam chalta nahin hai

dekh le meri mayyat ka manzar log kandha badalte chale hain

ek teri bhi Doli chali hai koi kandha badalta nahin hai

mai-kade ke sabhi pine wale laDkhaDa kar sanbhalte hain lekin

teri nazron ka jo jam pi le umr-bhar wo sanbhalta nahin hai