aap bulaen hum na aaen aisi koi baat nahin

aap bulā.eñ ham na aa.eñ aisī koī baat nahīñ

duniyā vāloñ se Dar jaa.eñ aisī koī baat nahīñ

tere sivā haiñ is duniyā meñ apne bhī ġham-ḳhvār bahut

sab ko dil kā raaz sunā.eñ aisī koī baat nahīñ

rāh-e-vafā meñ ham ne yaaro saarī umr guzārī hai

chalte chalte Thokar khā.eñ aisī koī baat nahīñ

saare rishte saare bandhan pyaar ke ab tak qaa.em hai

un ko apne dil se bhulā.eñ aisī koī baat nahīñ

mīThī mīThī bāteñ karnā ham se bhī to aatī haiñ

lekin aap kā dil bahlā.eñ aisī koī baat nahīñ

terī judā.ī ġham kā aalam ye sab hai taqdīr kī den

ro ro kar ham ashk bahā.eñ aisī koī baat nahīñ

ġham ke maare is duniyā meñ 'ārif' ab tak zinda haiñ

ġham se tumhāre ham ghabrā.eñ aisī koī baat nahīñ

aap bulaen hum na aaen aisi koi baat nahin

duniya walon se Dar jaen aisi koi baat nahin

tere siwa hain is duniya mein apne bhi gham-KHwar bahut

sab ko dil ka raaz sunaen aisi koi baat nahin

rah-e-wafa mein hum ne yaro sari umr guzari hai

chalte chalte Thokar khaen aisi koi baat nahin

sare rishte sare bandhan pyar ke ab tak qaem hai

un ko apne dil se bhulaen aisi koi baat nahin

miThi miThi baaten karna hum se bhi to aati hain

lekin aap ka dil bahlaen aisi koi baat nahin

teri judai gham ka aalam ye sab hai taqdir ki den

ro ro kar hum ashk bahaen aisi koi baat nahin

gham ke mare is duniya mein 'arif' ab tak zinda hain

gham se tumhaare hum ghabraen aisi koi baat nahin