aap danista jo katra ke guzar jate hain

aap dānista jo katrā ke guzar jaate haiñ

mere ehsās meñ sau dard utar jaate haiñ

paas aa kar bhī agar paas na aa.e koī

ham shab-e-vasl kī tanhā.ī meñ mar jaate haiñ

kyā ajab daur-e-pur-āshob hai jis meñ ai dost

log dastār bachāte haiñ to sar jaate haiñ

jab pasīne kā ḳharīdār na ho tab mazdūr

shaam ko nazreñ jhukā.e hue ghar jaate haiñ

zaḳhmī lafzoñ pe bhī hañs hañs ke agar daad mile

ham se shā.ir to usī vaqt hī mar jaate haiñ

apne mahbūb se milne ke liye roz 'sabīn'

tum ko ma.alūm hai ham chāñd-nagar jaate haiñ

aap danista jo katra ke guzar jate hain

mere ehsas mein sau dard utar jate hain

pas aa kar bhi agar pas na aae koi

hum shab-e-wasl ki tanhai mein mar jate hain

kya ajab daur-e-pur-ashob hai jis mein ai dost

log dastar bachate hain to sar jate hain

jab pasine ka KHaridar na ho tab mazdur

sham ko nazren jhukae hue ghar jate hain

zaKHmi lafzon pe bhi hans hans ke agar dad mile

hum se shair to usi waqt hi mar jate hain

apne mahbub se milne ke liye roz 'sabin'

tum ko malum hai hum chand-nagar jate hain