aap jab aae to jine ki ada bhi aai

aap jab aa.e to jiine kī adā bhī aa.ī

yak-ba-yak dil ke dhaḌakne kī sadā bhī aa.ī

uTh ga.ī aañkh to kaliyoñ ne bhī āñkheñ kholīñ

khul ga.ī zulf to lahrā ke ghaTā bhī aa.ī

terī zulfoñ kī mahak hī abhī laa.ī thī sabā

ki lahak kar tire dāman kī havā bhī aa.ī

abhī jaagā bhī na thā tere tasavvur kā fusūñ

ki achānak tire qadmoñ kī sadā bhī aa.ī

abhī baḳhshā bhī na thā lab ne tire āb-e-hayāt

ki qazā ban ke nigāhoñ meñ hayā bhī aa.ī

aql kahtī hī rahī aur mohabbat baḌh kar

zindagānī tire kūche meñ luTā bhī aa.ī

dil isī soch meñ gum hai ki kahūñ yā na kahūñ

nigah-e-shauq vo afsāna sunā bhī aa.ī

dāvar-e-hashr to ik soch meñ baiThā hī rahā

terī raftār ka.ī hashr uThā bhī aa.ī

aap jab aae to jine ki ada bhi aai

yak-ba-yak dil ke dhaDakne ki sada bhi aai

uTh gai aankh to kaliyon ne bhi aankhen kholin

khul gai zulf to lahra ke ghaTa bhi aai

teri zulfon ki mahak hi abhi lai thi saba

ki lahak kar tere daman ki hawa bhi aai

abhi jaga bhi na tha tere tasawwur ka fusun

ki achanak tere qadmon ki sada bhi aai

abhi baKHsha bhi na tha lab ne tere aab-e-hayat

ki qaza ban ke nigahon mein haya bhi aai

aql kahti hi rahi aur mohabbat baDh kar

zindagani tere kuche mein luTa bhi aai

dil isi soch mein gum hai ki kahun ya na kahun

nigah-e-shauq wo afsana suna bhi aai

dawar-e-hashr to ek soch mein baiTha hi raha

teri raftar kai hashr uTha bhi aai