aap ka intizar rahta hai

aap kā intizār rahtā hai

dil bahut be-qarār rahtā hai

ye sifat hai sharāb-e-ulfat meñ

zindagī bhar ḳhumār rahtā hai

kuchh ḳhabar bhī hai tere kūche meñ

koī ummīd-vār rahtā hai

aap ke dar pe raat din hāzir

aap kā jāñ-nisār rahtā hai

hāl-e-dil ishq meñ nahīñ chhuptā

shakl se āshkār rahtā hai

dil mirā kyoñ na rashk-e-jannat ho

is meñ koī nigār rahtā hai

zindagī se to bhar gayā hai dil

maut kā intizār rahtā hai

chaar hotī haiñ un se jab nazreñ

dil pe kab iḳhtiyār rahtā hai

jis ko pās-e-zabāñ nahīñ hotā

sab kī nazroñ meñ ḳhaar rahtā hai

dil kahāñ pheñk duuñ kise de duuñ

ye bahut be-qarār rahtā hai

yaad hai vo nigāh-e-mast ab tak

be-piye hī ḳhumār rahtā hai

phir kisī ke firāq meñ 'hājir'

raat din ashk-bār rahtā hai

aap ka intizar rahta hai

dil bahut be-qarar rahta hai

ye sifat hai sharab-e-ulfat mein

zindagi bhar KHumar rahta hai

kuchh KHabar bhi hai tere kuche mein

koi ummid-war rahta hai

aap ke dar pe raat din hazir

aap ka jaan-nisar rahta hai

haal-e-dil ishq mein nahin chhupta

shakl se aashkar rahta hai

dil mera kyon na rashk-e-jannat ho

is mein koi nigar rahta hai

zindagi se to bhar gaya hai dil

maut ka intizar rahta hai

chaar hoti hain un se jab nazren

dil pe kab iKHtiyar rahta hai

jis ko pas-e-zaban nahin hota

sab ki nazron mein KHar rahta hai

dil kahan phenk dun kise de dun

ye bahut be-qarar rahta hai

yaad hai wo nigah-e-mast ab tak

be-piye hi KHumar rahta hai

phir kisi ke firaq mein 'hajir'

raat din ashk-bar rahta hai