aap ke dil ko mere dil se kahin pyar na ho

aap ke dil ko mire dil se kahīñ pyaar na ho

zindagī merī tarah aap kī dushvār na ho

mānñe se mirī Dar hai unheñ inkār na ho

ye mirī arz-e-tamannā kahīñ be-kār na ho

shauq se rabt-e-mohabbat ko baḌhā.eñ lekin

had se baḌh kar ye mohabbat kahīñ āzār na ho

zindagī rashk ke qābil ho mohabbat meñ agar

dil kī har baat pe iqrār ho inkār na ho

mere armānoñ kī duniyā kā ḳhudā-hāfiz ho

aap ke dil meñ agar jazba-e-īsār na ho

aish chūmegā qadam rañj ke din Talne de

mere dil un kī mohabbat se tū bezār na ho

zindagī yuuñ hī bhaTaktī rahe manzil ke liye

ek se ek ko duniyā meñ agar pyaar na ho

hijr ke ab to tasavvur se hī dam ghuTtā hai

meñ to mar jā.ūñ jo pahlū meñ mire yaar na ho

maiñ samajhtā huuñ vafādār-e-mohabbat us ko

jo mohabbat meñ vafāoñ kā talabgār na ho

rabt kī chāshnī kā kirkirā ho jaa.e maza

lutf-āmez mohabbat meñ jo takrār na ho

us pe hote haiñ zamāne ke karam ai 'afzal'

ik zarā se jo karam kā bhī ravādār na ho

aap ke dil ko mere dil se kahin pyar na ho

zindagi meri tarah aap ki dushwar na ho

manne se meri Dar hai unhen inkar na ho

ye meri arz-e-tamanna kahin be-kar na ho

shauq se rabt-e-mohabbat ko baDhaen lekin

had se baDh kar ye mohabbat kahin aazar na ho

zindagi rashk ke qabil ho mohabbat mein agar

dil ki har baat pe iqrar ho inkar na ho

mere armanon ki duniya ka KHuda-hafiz ho

aap ke dil mein agar jazba-e-isar na ho

aish chumega qadam ranj ke din Talne de

mere dil un ki mohabbat se tu bezar na ho

zindagi yun hi bhaTakti rahe manzil ke liye

ek se ek ko duniya mein agar pyar na ho

hijr ke ab to tasawwur se hi dam ghuTta hai

mein to mar jaun jo pahlu mein mere yar na ho

main samajhta hun wafadar-e-mohabbat us ko

jo mohabbat mein wafaon ka talabgar na ho

rabt ki chashni ka kirkira ho jae maza

lutf-amez mohabbat mein jo takrar na ho

us pe hote hain zamane ke karam ai 'afzal'

ek zara se jo karam ka bhi rawadar na ho