aap ke zauq-e-sitam ka gham nahin

aap ke zauq-e-sitam kā ġham nahīñ

haañ magar ab zindagī meñ dam nahīñ

ai jafā-e-dost ye bhī kam nahīñ

dard ab bhī hai magar ab ġham nahīñ

is meñ paḌh letā huuñ tafsīr-e-hayāt

ye mirā dil hai ye jām-e-jam nahīñ

aadmī kī ḳhud-farebī al-amān

aur apne dukh bhī ab mahram nahīñ

in meñ shāmil hai mire dil kī tapish

ashk haiñ ye qatra-e-shabnam nahīñ

tark-e-mai se aur bhī aayā surūr

hosh bhī mad.hoshiyoñ se kam nahīñ

'maikash' un kī nargisī āñkhoñ kā vaar

kitnā qātil hai agarche sam nahīñ

aap ke zauq-e-sitam ka gham nahin

han magar ab zindagi mein dam nahin

ai jafa-e-dost ye bhi kam nahin

dard ab bhi hai magar ab gham nahin

is mein paDh leta hun tafsir-e-hayat

ye mera dil hai ye jam-e-jam nahin

aadmi ki KHud-farebi al-aman

aur apne dukh bhi ab mahram nahin

in mein shamil hai mere dil ki tapish

ashk hain ye qatra-e-shabnam nahin

tark-e-mai se aur bhi aaya surur

hosh bhi madhoshiyon se kam nahin

'maikash' un ki nargisi aankhon ka war

kitna qatil hai agarche sam nahin