aap se arz-e-haal karte hain

aap se arz-e-hāl karte haiñ

vāqa.ī ham kamāl karte haiñ

aa.ina dil kā TuuT jaatā hai

laakh ham dekh-bhāl karte haiñ

usī zālim se hai umīd-e-vafā

apne dil se savāl karte haiñ

aap ke harf-e-talḳh bhī aksar

zaḳhm kā indimāl karte haiñ

zikr hotā hai jab hasīnoñ kā

pesh terī misāl karte haiñ

ham to aadī haiñ ġham uThāne ke

aap yūñhī ḳhayāl karte haiñ

tere andāz-e-bevafā.ī bhī

duur dil kā malāl karte haiñ

un kī mahfil meñ jo guzāre the

yaad vo māh-o-sāl karte haiñ

ham ne kī hai na ham kabhī ai 'soz'

ārzū-e-visāl karte haiñ

aap se arz-e-haal karte hain

waqai hum kamal karte hain

aaina dil ka TuT jata hai

lakh hum dekh-bhaal karte hain

usi zalim se hai umid-e-wafa

apne dil se sawal karte hain

aap ke harf-e-talKH bhi aksar

zaKHm ka indimal karte hain

zikr hota hai jab hasinon ka

pesh teri misal karte hain

hum to aadi hain gham uThane ke

aap yunhi KHayal karte hain

tere andaz-e-bewafai bhi

dur dil ka malal karte hain

un ki mahfil mein jo guzare the

yaad wo mah-o-sal karte hain

hum ne ki hai na hum kabhi ai 'soz'

aarzu-e-visal karte hain