aap se kya dosti hone lagi

aap se kyā dostī hone lagī

apne dil se dushmanī hone lagī

phir hasīnoñ kī taraf maa.il hai dil

maut se phir dil-lagī hone lagī

muskurā.ī merī tauba par bahār

pārsā.ī kī hañsī hone lagī

tum na the to dil ko ik taskīn thī

tum jo aa.e be-kalī hone lagī

har ḳhushī meñ ġham kā ik pahlū milā

har na.e ġham se ḳhushī hone lagī

sun ke 'sāhir' kī ġhazal us ne kahā

shā.irī jādūgarī hone lagī

aap se kya dosti hone lagi

apne dil se dushmani hone lagi

phir hasinon ki taraf mail hai dil

maut se phir dil-lagi hone lagi

muskurai meri tauba par bahaar

parsai ki hansi hone lagi

tum na the to dil ko ek taskin thi

tum jo aae be-kali hone lagi

har KHushi mein gham ka ek pahlu mila

har nae gham se KHushi hone lagi

sun ke 'sahir' ki ghazal us ne kaha

shairi jadugari hone lagi