aap se shikwa-e-bedad karun ya na karun

aap se shikva-e-bedād karūñ yā na karūñ

shauq-e-pāband ko āzād karūñ yā na karūñ

aap haiñ vaqt hai fursat hai zarā ye kah do

ab bayāñ ishq kī rūdād karūñ yā na karūñ

ai ġham-e-hijr batā ai dil-e-māyūs batā

mātam-e-hasrat-e-nāshād karūñ yā na karūñ

yuuñ to ab kuchh bhī nahīñ dīda-e-vīrāñ ko magar

chand ḳhvāboñ se bhī ābād karūñ yā na karūñ

merī qismat meñ sahī dard-o-alam kī rāheñ

shādmānī ko kahīñ yaad karūñ yā na karūñ

aaj mausam ne koī mast ġhazal chheḌī hai

zabt ko mā.il-e-fariyād karūñ yā na karūñ

zindagī ishq meñ miTnā hai to phir aise meñ

naaz tujh pe dil-e-barbād karūñ yā na karūñ

inqilābāt meñ tūfān-e-sitam meñ azmat

shān-e-altāf-o-karam yaad karūñ yā na karūñ

aap se shikwa-e-bedad karun ya na karun

shauq-e-paband ko aazad karun ya na karun

aap hain waqt hai fursat hai zara ye kah do

ab bayan ishq ki rudad karun ya na karun

ai gham-e-hijr bata ai dil-e-mayus bata

matam-e-hasrat-e-nashad karun ya na karun

yun to ab kuchh bhi nahin dida-e-viran ko magar

chand KHwabon se bhi aabaad karun ya na karun

meri qismat mein sahi dard-o-alam ki rahen

shadmani ko kahin yaad karun ya na karun

aaj mausam ne koi mast ghazal chheDi hai

zabt ko mail-e-fariyaad karun ya na karun

zindagi ishq mein miTna hai to phir aise mein

naz tujh pe dil-e-barbaad karun ya na karun

inqilabaat mein tufan-e-sitam mein azmat

shan-e-altaf-o-karam yaad karun ya na karun