aap se shikwa-e-bedad nahin karte hum

aap se shikva-e-bedād nahīñ karte ham

hoñT sī lete haiñ fariyād nahīñ karte ham

muzhda-e-zauq-e-asīrī ki vo farmāte haiñ

qaid-e-ġham se tujhe āzād nahīñ karte ham

muskurā dete haiñ jab koī balā aatī hai

kisī sūrat ġham-e-uftād nahīñ karte ham

ḳhuub parda hai ye zāhir kā gumāñ hai un ko

ḳhvāhish-e-husn-e-ḳhudā-dād nahīñ karte ham

dil meñ baaqī hai abhī hausla-e-sabr-o-qarār

hasrat-e-tesha-e-farhād nahīñ karte ham

kyā ḳhabar kaun sī manzil pe mohabbat pahuñchī

ab ye aalam hai tujhe yaad nahīñ karte ham

apnī uftād-o-tabī.at hī kuchh aisī hai 'nazīr'

kabhī andesha-e-uftād nahīñ karte ham

aap se shikwa-e-bedad nahin karte hum

honT si lete hain fariyaad nahin karte hum

muzhda-e-zauq-e-asiri ki wo farmate hain

qaid-e-gham se tujhe aazad nahin karte hum

muskura dete hain jab koi bala aati hai

kisi surat gham-e-uftad nahin karte hum

KHub parda hai ye zahir ka guman hai un ko

KHwahish-e-husn-e-KHuda-dad nahin karte hum

dil mein baqi hai abhi hausla-e-sabr-o-qarar

hasrat-e-tesha-e-farhad nahin karte hum

kya KHabar kaun si manzil pe mohabbat pahunchi

ab ye aalam hai tujhe yaad nahin karte hum

apni uftad-o-tabiat hi kuchh aisi hai 'nazir'

kabhi andesha-e-uftad nahin karte hum