aap sultan hua kije gada hum bhi nahin

aap sultān huā kiije gadā ham bhī nahīñ

is qadar to ga.e-guzre ba-ḳhudā ham bhī nahīñ

ab anā ko kare sajda to mohabbat hī kare

jab.ha-sā aap nahīñ nāsiya-sā ham bhī nahīñ

jā.iye jā.iye mat dekhiye muḌ kar pīchhe

aise shauqīn-e-jafā ḳhār-e-vafā ham bhī nahīñ

chāra-e-sarkashī-e-dil kareñ allāh allāh

vo ḳhudā banda-navāz aap to kyā ham bhī nahīñ

dostī dushmanī ab aap nibhā.eñ to nibhā.eñ

ham ko rabt aap se aisā koī bāham bhī nahīñ

mehrbān aap bhī haiñ aur bhī hoñge lekin

chāhte to dil-e-nādāñ kā burā ham bhī nahīñ

laakh lailā.eñ umaD aa.eñ ġhazal par 'rāhīl'

āḳhir is dasht kī āvāra sadā ham bhī nahīñ

aap sultan hua kije gada hum bhi nahin

is qadar to gae-guzre ba-KHuda hum bhi nahin

ab ana ko kare sajda to mohabbat hi kare

jabha-sa aap nahin nasiya-sa hum bhi nahin

jaiye jaiye mat dekhiye muD kar pichhe

aise shauqin-e-jafa KHar-e-wafa hum bhi nahin

chaara-e-sarkashi-e-dil karen allah allah

wo KHuda banda-nawaz aap to kya hum bhi nahin

dosti dushmani ab aap nibhaen to nibhaen

hum ko rabt aap se aisa koi baham bhi nahin

mehrban aap bhi hain aur bhi honge lekin

chahte to dil-e-nadan ka bura hum bhi nahin

lakh lailaen umaD aaen ghazal par 'rahil'

aaKHir is dasht ki aawara sada hum bhi nahin