teri mahak ne hi tera pata diya hai mujhe

tirī mahak ne hī terā pata diyā hai mujhe

ḳhudā kā shukr ki tujh se milā diyā hai mujhe

maiñ ek tiir thā us kī kamāñ meñ rakhā huā

aur us ne yūñhī havā meñ chalā diyā hai mujhe

kisī kī āñkheñ sajā.ī thī mere chehre par

kisī kā ḳhvāb thā lekin dikhā diyā hai mujhe

milā ke ḳhaak samundar ke khāre paanī meñ

ghumā ke chaak achānak banā diyā hai mujhe

'ajīb 'ishq thā jis ne numūd karte vaqt

haTā diyā hai junūñ aur baḌhā diyā hai mujhe

shab-e-firāq meñ us ko bhulā ke soyā thā

par us ne ḳhvāb meñ aa kar jagā diyā hai mujhe

maiñ jāntā huuñ vo mere liye banā hī nahīñ

maiñ sochtā huuñ mohabbat ne kyā diyā hai mujhe

merī giraft meñ aatā nahīñ badan us kā

ye kis ḳhayāl ke pīchhe lagā diyā hai mujhe

phir us kī aañkh meñ aañsū haiñ kis liye 'ārib'

vo jis ko zo'm thā yaksar bhulā diyā hai mujhe

teri mahak ne hi tera pata diya hai mujhe

KHuda ka shukr ki tujh se mila diya hai mujhe

main ek tir tha us ki kaman mein rakha hua

aur us ne yunhi hawa mein chala diya hai mujhe

kisi ki aankhen sajai thi mere chehre par

kisi ka KHwab tha lekin dikha diya hai mujhe

mila ke KHak samundar ke khaare pani mein

ghuma ke chaak achanak bana diya hai mujhe

'ajib 'ishq tha jis ne numud karte waqt

haTa diya hai junun aur baDha diya hai mujhe

shab-e-firaq mein us ko bhula ke soya tha

par us ne KHwab mein aa kar jaga diya hai mujhe

main jaanta hun wo mere liye bana hi nahin

main sochta hun mohabbat ne kya diya hai mujhe

meri giraft mein aata nahin badan us ka

ye kis KHayal ke pichhe laga diya hai mujhe

phir us ki aankh mein aansu hain kis liye 'arib'

wo jis ko zo'm tha yaksar bhula diya hai mujhe