ghaT ke pas se guzregi magar dhyan rahe

ghaaT ke paas se guzregī magar dhyān rahe

fāltū baat na karnā ki merā maan rahe

ġhair-mahsūs tarīqe se tujhe dekhnā hai

ġhair-tartīb nazar merī pareshān rahe

terī āvāz se pahle thā faqat shor yahāñ

yā'nī ham saut-o-sadā se bhī pareshān rahe

ghar se niklā huuñ du'ā koī nahīñ mere saath

mo'jiza hogā agar rāsta āsān rahe

ye ḳhushī hai ki mujhe dekh ke pahchān liyā

aur dukh ye ki mire haal se anjān rahe

tere aane pe ka.ī phuul khile the jin meñ

tere jaane se vo guldān pareshān rahe

haañ magar khiḌkiyāñ khulne lagī chillāne se

dar-o-dīvār ki be-jān the be-jān rahe

sāmnā ho to pashemānī na ho chehroñ par

kam se kam itnā ta'alluq to mirī jaan rahe

silsila-vār guzartī rahe ye 'umr-e-ravāñ

sāñs-dar-sāñs har ik marhala āsān rahe

kāñpte haath se us but ko chhuā thā 'ārib'

kyā 'ajab hai ki salāmat mirā īmān rahe

ghaT ke pas se guzregi magar dhyan rahe

faltu baat na karna ki mera man rahe

ghair-mahsus tariqe se tujhe dekhna hai

ghair-tartib nazar meri pareshan rahe

teri aawaz se pahle tha faqat shor yahan

ya'ni hum saut-o-sada se bhi pareshan rahe

ghar se nikla hun du'a koi nahin mere sath

mo'jiza hoga agar rasta aasan rahe

ye KHushi hai ki mujhe dekh ke pahchan liya

aur dukh ye ki mere haal se anjaan rahe

tere aane pe kai phul khile the jin mein

tere jaane se wo guldan pareshan rahe

han magar khiDkiyan khulne lagi chillane se

dar-o-diwar ki be-jaan the be-jaan rahe

samna ho to pashemani na ho chehron par

kam se kam itna ta'alluq to meri jaan rahe

silsila-war guzarti rahe ye 'umr-e-rawan

sans-dar-sans har ek marhala aasan rahe

kanpte hath se us but ko chhua tha 'arib'

kya 'ajab hai ki salamat mera iman rahe