aarif hai wo jo husn ka juya jahan mein hai

aarif hai vo jo husn kā juuyā jahāñ meñ hai

bāhar nahīñ hai yūsuf isī kārvāñ meñ hai

piirī meñ shuġhl-e-mai hai javānanā roz-o-shab

bū-e-bahār aatī hamārī ḳhizāñ meñ hai

hotā hai gul ke sūñghe se duunā girafta dil

mujh sā bhī bad-dimāġh kam is bostāñ meñ hai

pusht-e-ḳhamīda dekh ke hotā huuñ na.ara-zan

kartā huuñ sarf-e-tīr jo zor is kamāñ meñ hai

dikhlā rahī hai dil kī safā do-jahāñ kī sair

kyā ā.īna lagā huā apne makāñ meñ hai

dīvāna jo na ishq se ho aadmī nahīñ

husn-e-parī kā jalva tilism-e-jahāñ meñ hai

parvānoñ kī tarah hai hujūm-e-qadah-kashāñ

raushan charāġh-e-bāda jo muġh kī dukāñ meñ hai

us dilrubā ke kūche meñ aage havā se jaa.e

itnī to jaan ab bhī tan-e-nā-tavāñ meñ hai

duniyā se kuuch karnā hai ik roz rahravo

bāñg-e-jaras se shor yahī kārvāñ meñ hai

paḌh saktā sarnavisht kā matlab koī nahīñ

ma.alūm kuchh nahīñ ki ye ḳhat kis zabāñ meñ hai

ā.inda-o-raviñda kī chaltī haiñ Thokareñ

jaada jo apnā thā usī ḳhvāb-e-girāñ meñ hai

kushte haiñ baaġh meñ bhī tirī teġh-e-nāz ke

bū-e-shahīd laala meñ aur arġhavāñ meñ hai

āshiq ke rañg-e-zard ko dekho to hañs paḌo

tāsīr us meñ bhī hai vo jo za.afarāñ meñ hai

ma.adūm vo kamar hai na mauhūm vo dahan

kahte haiñ shā.er un ke jo kuchh kuchh gumāñ meñ hai

gul TūTte haiñ hote haiñ bulbul asīr-e-dām

sayyād musta.id madad-e-bāġhbāñ meñ hai

sarkash kī manzilat hai subuk pesh-e-ḳhāksār

vo tamkanat zamīñ kī kahāñ āsmāñ meñ hai

sumbul se hāl-e-gul huuñ maiñ ye kah ke pūchhtā

kis silsile meñ tū hai ye kis ḳhāndāñ meñ hai

dil meñ ḳhayāl-e-gesu-e-mushkīñ hai bad balā

ye murġh-e-rūh ke liye saañp āshiyāñ meñ hai

hikmat se hai ye ḳhaak kā putlā banā huā

nuur aañkh meñ hai us ke to maġhz ustuḳhāñ meñ hai

'ātish' buland-pāya hai dargāh yaar kī

haftum falak kī rif.at isī āstāñ meñ hai

aarif hai wo jo husn ka juya jahan mein hai

bahar nahin hai yusuf isi karwan mein hai

piri mein shughl-e-mai hai jawanana roz-o-shab

bu-e-bahaar aati hamari KHizan mein hai

hota hai gul ke sunghe se duna girafta dil

mujh sa bhi bad-dimagh kam is bostan mein hai

pusht-e-KHamida dekh ke hota hun nara-zan

karta hun sarf-e-tir jo zor is kaman mein hai

dikhla rahi hai dil ki safa do-jahan ki sair

kya aaina laga hua apne makan mein hai

diwana jo na ishq se ho aadmi nahin

husn-e-pari ka jalwa tilism-e-jahan mein hai

parwanon ki tarah hai hujum-e-qadah-kashan

raushan charagh-e-baada jo mugh ki dukan mein hai

us dilruba ke kuche mein aage hawa se jae

itni to jaan ab bhi tan-e-na-tawan mein hai

duniya se kuch karna hai ek roz rahrawo

bang-e-jaras se shor yahi karwan mein hai

paDh sakta sarnawisht ka matlab koi nahin

malum kuchh nahin ki ye KHat kis zaban mein hai

aainda-o-rawinda ki chalti hain Thokaren

jada jo apna tha usi KHwab-e-giran mein hai

kushte hain bagh mein bhi teri tegh-e-naz ke

bu-e-shahid lala mein aur arghawan mein hai

aashiq ke rang-e-zard ko dekho to hans paDo

tasir us mein bhi hai wo jo zafaran mein hai

madum wo kamar hai na mauhum wo dahan

kahte hain shaer un ke jo kuchh kuchh guman mein hai

gul TuTte hain hote hain bulbul asir-e-dam

sayyaad mustaid madad-e-baghban mein hai

sarkash ki manzilat hai subuk pesh-e-KHaksar

wo tamkanat zamin ki kahan aasman mein hai

sumbul se haal-e-gul hun main ye kah ke puchhta

kis silsile mein tu hai ye kis KHandan mein hai

dil mein KHayal-e-gesu-e-mushkin hai bad bala

ye murgh-e-ruh ke liye sanp aashiyan mein hai

hikmat se hai ye KHak ka putla bana hua

nur aankh mein hai us ke to maghz ustuKHan mein hai

'atish' buland-paya hai dargah yar ki

haftum falak ki rifat isi aastan mein hai