aariz mein tumhaare kya safa hai

aariz meñ tumhāre kyā safā hai

muñh aa.ina apnā dekhtā hai

dumbāla jo surme kā banā hai

ye teġh-e-nigah kā par tulā hai

bīmār jo terī chashm kā hai

nargis pe kab aañkh Dāltā hai

do laakh fareb-e-hazrat-e-ishq

banda na kahegā but ḳhudā hai

sab kahte haiñ jis ko māh-e-kāmil

naqsha kaf-e-pā-e-yār kā hai

gardish meñ hai chashm zer-e-abrū

kyā nīmcha charḳh par chaḌhā hai

maarā hai dikhā ke dast-e-rañgīñ

shāhid mire ḳhuun kī hinā hai

phir aa.e bahār phir ho vahshat

dil roz duā.eñ māñgtā hai

kāñToñ se ye kah rahī hai lailā

majnūñ mirā barahna-pā hai

joban pe haiñ ab to anār-e-pistāñ

naḳhl-e-qad-e-yār kyā phalā hai

be-vaj.h jo phir ga.e ho phir jaao

bande kā bhī ai buto ḳhudā hai

jo chāho karo ki tum ho muḳhtār

majbūr huuñ zor kyā mirā hai

kartī nahīñ kyuuñ safar mirī ruuh

kyā band adam kā rāstā hai

rone meñ haiñ yaad daañt us ke

har kū har ashk be-bahā hai

vasf us kā 'qalaq' ho kis zabāñ se

vo but ik qudrat-e-ḳhudā hai

aariz mein tumhaare kya safa hai

munh aaina apna dekhta hai

dumbaala jo surme ka bana hai

ye tegh-e-nigah ka par tula hai

bimar jo teri chashm ka hai

nargis pe kab aankh Dalta hai

do lakh fareb-e-hazrat-e-ishq

banda na kahega but KHuda hai

sab kahte hain jis ko mah-e-kaamil

naqsha kaf-e-pa-e-yar ka hai

gardish mein hai chashm zer-e-abru

kya nimcha charKH par chaDha hai

mara hai dikha ke dast-e-rangin

shahid mere KHun ki hina hai

phir aae bahaar phir ho wahshat

dil roz duaen mangta hai

kanTon se ye kah rahi hai laila

majnun mera barahna-pa hai

joban pe hain ab to anar-e-pistan

naKHl-e-qad-e-yar kya phala hai

be-wajh jo phir gae ho phir jao

bande ka bhi ai buto KHuda hai

jo chaho karo ki tum ho muKHtar

majbur hun zor kya mera hai

karti nahin kyun safar meri ruh

kya band adam ka rasta hai

rone mein hain yaad dant us ke

har ku har ashk be-baha hai

wasf us ka 'qalaq' ho kis zaban se

wo but ek qudrat-e-KHuda hai