mera KHat hai jahan yaro wo rashk-e-hur le jaana

mirā ḳhat hai jahāñ yaaro vo rashk-e-hūr le jaanā

kisī sūrat se vaañ tak tum mirā mazkūr le jaanā

agar vo sho.ala-rū pūchhe mire dil ke phaphūloñ ko

to us ke sāmne ik ḳhosha-e-añgūr le jaanā

jo ye pūchhe ki ab kitnī hai us ke rañg par zardī

to yaaro tum gul-e-sad-barg yā kāfūr le jaanā

agar pūchhe mire siine ke zaḳhmoñ ko to ai yaaro

kahīñ se DhūñDh kar ik ḳhāna-e-zambūr le jaanā

raqīb-e-rū-siyah ke haal kā gar mājrā pūchhe

to us ke sāmne jañgal se ik lañgūr le jaanā

'nazīr' ik din ḳhushī se yaar ne hañs kar kahā mujh ko

ki tū bhī ek bosa ham se ai ranjūr le jaanā

mera KHat hai jahan yaro wo rashk-e-hur le jaana

kisi surat se wan tak tum mera mazkur le jaana

agar wo shoala-ru puchhe mere dil ke phaphulon ko

to us ke samne ek KHosha-e-angur le jaana

jo ye puchhe ki ab kitni hai us ke rang par zardi

to yaro tum gul-e-sad-barg ya kafur le jaana

agar puchhe mere sine ke zaKHmon ko to ai yaro

kahin se DhunDh kar ek KHana-e-zambur le jaana

raqib-e-ru-siyah ke haal ka gar majra puchhe

to us ke samne jangal se ek langur le jaana

'nazir' ek din KHushi se yar ne hans kar kaha mujh ko

ki tu bhi ek bosa hum se ai ranjur le jaana